Das isch es gsi vo däm Wältebummel! :-)

March 13th, 2007

Mini letschte Täg hani hie in Rio de Janeiro verbracht. Jede Tag chli ga sünnele u ga bedele! 🙂 So richtig relaxe halt! Aber nach dere doch eher asträngende, wenn o absolut wundervolle Reis, isch das genau das gsi wos brucht het, zum all die Idrück u vile Erläbnis chli ds verarbeite. U schliesslich hani ja no chli Ferie wöuä, bevors itz de scho gli wider los geit mit schaffe! I wett mi ganz ganz härzlech bi allne bedanke wo mi i dere Zyt understützt u begleitet hei! Es isch mir mega vil Wärt, ds wüsse das da so vil gueti Fründe ume si! I weiss das mega ds schetze u freue mi extrem druf euch ab morn wider ds träffe! O äs härzlechs dankeschön a alli mini Reisebekanntschafte. Ha mega vil schöns mit euch erläbt! O mit dene wos itz nid chöi läse! 😉 Bi mir sicher, das da einegi sehr schöni u gueti neui Fründschafte entstöh, bzw. entstande si! I wott das alles gar nid länger usfüere. Wär frage het, öppis wott ha oder mi gärn wett träffe, söu sech eifach mälde. Wirde mir müe gä, euch allne so schnäu wie möglich gerächt ds wärde! Aber bitte sit mir nid bös, weni nid alles uf einisch cha! Ok? 🙂 Freue mi risig über alles u bi mega dankbar, hani das alles chönne erläbe u zum Teil chli mit euch teile! Also bis bald, dir Liebe!

Liebi Grüess a alli

 

P.s Fotos vo Brasilie ladeni de dehei ufe!

Rio zum 2. u letschte!

March 13th, 2007

Am Sunntig bini also wie scho gseit no mit der Ana a Strand u derna si mir go ds Nacht Ässe. Si het mi wider ines super guets Restaurant gfüert. Das mau si mir chli tradizioneller ga ässe u eher billig im Verhältnis zu süsch. D´Chuchi isch aber sehr guet gsi u der extrem schüch Kellner isch du zum Schluss ono chli uftaut. Zersch het er gar nid wöuä mit mir rede, woner gmerkt het das i nid portugisisch rede mit der Ana. Het mi afangs chli gnärvt gha, da i ihn uf “portugisisch” öppis gfragt ha u är mi gar nid agluegt het, sondern sech grad ad Ana gwändet het. Aber är isch eifach chli schüch u vermuetlich nid grad so bildet gsi. Am Schluss het ärs du ömu no versuecht u o no äs härzlechs lächle übrig gha für mi! Bi derna im Hostel no ad Bar ä Schlummertrunk ga nä, nachdäm mi d´Ana het hei bracht. Am Mäntig bini wider spät use u derna ga ds Morge ässe, was me hie bis am 1 cha! 🙂 Super! Nid? Derna bini a Strand ga sünnele u am Abe no chli ga jogge! Fuer mis erschte mau sit Monate si 5km gnue gsi. Ha sogar no möge! 🙂 Ha grad sälber gstuunet! U zum ds Nacht hets wider da im Hostel Spaghetti gä. Derna no chli umechille vorem is Bett ga. Der nächscht Tag bini wider spät use, was i mir für die ganz Wuche ha vorgno gha! 🙂 Derna äs guets ds Morge wie der räschte vor Wuche. Denn chli sünnele am Strand, bevor i de am Abe bi ga Jogge. Das mau sogar chli lenger! 🙂 Cha hie so ä gäbegi Rundi vo 8km mache am Strand entlang. Het all 400m ä Markierig, drum weiss i das so genau. Sprich Copacabanabeach isch ca. 4km läng! Allerdings isch es nid der schönscht Strand, denn mir gfallt rein vo däm här Barra oder Ipanema einiges besser. Derna hets no Championsleague uf Grosslinwand gä i der Bar, bevor i wider früe is Bett bi. Der Mittwuch isch du fasch genau glich gsi, nur das i mitem Patrick (are neue CH-Bekanntschaft usem Jura) am Strand gsi bi. Am Abe i der Bar hani zuesätzlich zu geschter no äs Gratis Menu chönne izieh, da i scho länger da im Hotel bi. Es het Pulet-Curry nach Indisch gä. Na ja…. under Indisch würde mir öppis anders verstah! 🙂 Aber mit vil würze isch es gniessbar gsi! Der Dunschtig, Fritig u Samschtig hei meh oder weniger genau glich usgseh. Immer wider sünnele, mis obligate Ründeli jogge u ab und an chli whirle im Hoteleigene Pool. Am Samschtig Abe hani du no mit der Ana i Usgang wöuä,aber us däm isch nüt worde. Also hani im Hotel wider äs Gratis-Ässe izoge. Das mau äs BBQ. Isch zwar nid grad das für abdsnäh, aber nach däm i jede Tag 8km bi ga Jogge, hani mir das gönnt. Das ja eh gratis isch gsi u vil Salat gä het, isch es o nid sooo schlimm gsi! 🙂 Am Sunntig hani du chli Internetstuff gmacht, bevor i wider im Pool gsi bi. Derna mis obligate Ründeli am Strand, bevor i am Abe no zur Ana bi. Mir si zäme eis ga zie u i ha mi no vo irne Eltere verabschidet. Geschter no eis mis tradizonelle Programm u derna no äs witers gratis ds Nacht! Hüt nur chli umehange, bevor i ufe Flüger ga für hei! Juhuuu!!!Freue mi megamässig!!!

Das isch also gsi, bis bald. LG a alli

Rio de Janeiro!

March 4th, 2007

Ha ä rächt guete Flug gha u bi entspannt in Rio glandet. Scho bim Aflug hani ä relativ guete Idruck vo dere Stadt gha, denn i ha vil grüen gseh, was mir immer gfallt! D´Ana Paula het mi du o scho erwartet! Es isch es härzlechs widersehe gsi! U zu mim erstuune isch si o miteme Auto da gsi, obschon si gseit het, si heig kes. Es isch das vo irem Vater gsi, wos nach der Arbeit a Flughafe bracht het u mitem Bus oder Taxi hei isch! Mega nätt! I bi du mit ire grad direkt id Stadt, denn si het no ä Termin gha! D`Froue hie am Strand si itz doch de oeppe das woni erwartet haet, zimilich sexy! 🙂 Bi naemli wärend dere zyt chli am naheglägene Strand gsi ga spatziere u derna no äs Käfeli ga ha. Derna si mir no chli in Leblanc, amene sehr riche Viertel hie, gsi. Dert si mir chli umenand gstiflet u hei öppis chlises gässe u trunke. Derna si mir zu ire hei. Si wohnt mit irne Eltere imene Hochhuus im 21. u oberschte Stock. Ä Luxuswohnig, chani euch säge! 🙂 Normal si uf eim Stock 16 Wohnige. Ds Oberscht si grad mau 4! Si hei ä Pool uf der Terasse, ä BBQ Egge, ä rise TV, ä grossi Chuchi, alles mit Klimaalage, usw.. Der Hammer! U i ha hie mis eigene Zimmerli übercho! Isch mega gsi. Nach ere Tuschi und chli smalltalk mit de sehr fründliche Eltere, si mir ab i Usgang. Zersch öppis chlises ga ässe u derna ine Art Disco! Isch mega gsi. Iri Fruendin, woni in Salvador hät söuä undercho isch o no cho. Am nächschte Morge hani du chönne usschlafe, denn d´Ana isch id Schuel. Si isch gstudierti Rächtsawältin, schaffet aber als professionelli Baletttänzerin u geit drum immer no chli id Schuel, damit si das ganze nid verlehrt u alles aktuell bhaltet. So bini also später ufgstande u ha mi im Kühlschrank bedient, wie mir das nöch gleit worde isch! Feins ds Morge gsi mit allem drum u dra. Woni du ha wöuä abwäsche, isch der Vater scho wider zrugg gsi u het mir das grad verbote u us de Händ gno! I sig da Gast u das mach d´Putzfrau. I söu gfelligscht mit ine a Tisch füre cho, denn si Sohn u Schwigertochter sige grad cho. Also hani das gmacht. Mir hei chli plöiderlet u derna bini vo dene Beide is Shoppingcenter gfahre worde, denn i ha no paar Sache müesse ha. När bini zrugg gloffe u bi no chli a Strand, wo ca. 7-8 min vo dene dehei isch. Nachere churze Stranderfahrig bini wider zu ine Hei, denn underdesse isch d´Ana hei cho. Mir si also scho bald wider loszoge! Allerdings het si nid so möge, so das mir nachemene späte ds Nacht nur no eis si ga trinke u scho zitig wider hei! Der nächscht Morge hei mir wider relativ lang gschlafe u hei derna alli zäme ds Zmorge gno. D´Ana het ä rise Sach uftischet, was si süsch nie mach! Aha… es isch aber o mega gsi! U der Vater vo ire isch äxtra no ä Dütschi Torte (ä Schoggichueche) ga hol für mi, da ja das ä Spezialität vo üs dehei sig! Na ja… aber es isch mega lieb dänkt gsi u i ha o so freud gha! 🙂 Nach däm si mir wider mitem Auto vo ihm los zoge. Zersch si mir der Chrischtus (Corcovado) ga aluege. Ä schöni Ussicht über d´Stadt het me vo dert us, mues i säge. Derna si mir ane eher verlassene Strand gfahre, wo aber a däm weekend ca. 100´000 Lüt ume gsi si zum erstuune vo der Ana. Si het sech das nid chönne erkläre u het gmeint vilich sig irgendes speziells Event gsi, denn süsch sig da fasch nie öpper ume. Mir hei aber eh nid der Strand, sondern äs super feins Restaurant i der Nöchi als Ziel gha. Dert si mir du mit müe u Not o häre cho! 🙂 Aber es het sech glohnt… Ds ässe isch der Hammer gsi. Mir hei so ä Art Shrimpssuppe oder Eitopf gha! Hmmmm…. soooo guet gsi! Nach der Rückkehr hani eigentli wöuä uszieh bi ine u is Hostel wächsle. Aber irgendwie het d´Resevation nid klappet. Also bini no ä Nacht meh gsi u derna am nächschte Tag is Hostel gfahre mitemene Taxi. Ds Hostel isch nid schlächt, het aber chli vil Lüt (vorallem Ängländer u Australier) u isch chli Lut. Allerdings hets o ä Whirlpool! 🙂 Am Nami bini du id Stadt zur Ana gfahre. Mir hei ire Arbeitsplatz, ds Nationaltheater under d´Lupe gno. Das isch ä super Füerig mit Iblick i Backstage Bereich gsi! Ds Theater isch ä chlini Nachbildig vo der Opere in Paris! Mega schön! Uf dere Füerig hei mir o no Kolleginne u Kollege vo der Ana troffe. Mit 3 Kolleginne si mir när no eis ga zie. bi mir chli fähl am Platz vor cho… so 4 super schöni u mega schlanki Froue am Tisch mit mir! 🙁 Na ja… ha du när wider der Verglich mit andere uf der Strass gmacht, damit i mir nid ganz sooo dick vorcho bi! 🙂 Am Abe bini im Hostel blibe u ha dert chli Spaghetti unes paar Drinks gha. Isch du o no ä Schwyzer ume gsi, so das es mir chli weniger schlimm vor cho isch. Denn ohni ihn, hät i ds Gfühl gha i sig in Ängland! Am Tag druf si du wie erwartet d´Evelyne u d´Manuela in Rio acho. Ha mi mega gfreut uf das träffe u bi die Beide am Flughafe miteme Röseli ga abhole. Da d´Manuela am Tag druf het Geburi gha, hei mir das als Überraschig planet gha! 🙂 Si isch gloub nid so würklech drus cho, wo si mi entdeckt het! 🙂 Aber es isch äs mega schöns u härzlechs widerseh gsi! Bi du mit dene Zwöi is Hotel (ä 5 Stärnbunker am Strand) gfahre u derna i das härzige Restaurant ga ässe, woni mit der Ana bi gsi. Ha ja gwüsst das es dert vil gueti Salät git…. d´Manu isch drum Vegi! Später si mir no i der Bar vom Hotel eis ga trinke u ufe Geburi vo der Manuela astosse. Derna hets du für mi ä unruhigi Nacht gä. Im Hostel hei sech paar betrunkeni Ängländer am 3 am Morge ä Stund lang agschraue, bevor si sech du definitiv ufd Nase gä hei! 🙂 Na ja… es het eifach ds vil vo dene da im Hostel. Der Tag druf bini du mit der Evelyne u der Manuela a Flughafe zum ga luege ob si ires Ticket wo ine in Buenos Aires wäg cho isch ersetzt überchöme und ob i allefalls mis hät chönne ufene andere Flug umbueche. Ds erschte het ribigslos klappet, aber für die Flüg hei isch leider alles usbuechet! Also wirde i definitiv ersch am 14. März hei cho! Für a Flughafe hei mir ja nid lang gha, so ca. ä halb Stund, aber zrugg hets du so vil Verkehr gha, das mir fasch 2 Stund si underwägs gsi! 🙁 Mir hätte eigentli lieber öppis anders gmacht am Geburi vo der Manu! Ja nu… immerhin hei si Tickets wider gha u das isch doch o scho ä Ufsteller gsi. 🙂 U da d´Evelyne no ä Chueche het la mache im Hotel zum Geburi, hei mir nach der Rückkehr no chli Schoggichueche schlemme gmacht! 🙂 Am Abe hani du öppis planet gha für die Beide, bzw. für d´Manu. Eigentli häts a Sambashow söuä wärde… das hei die Beide aber scho in Iguazu gseh. Also bini mit ine i das Lokal gange wo i mit der Ana am erschte Abe bi gsi. Ds Ässe, Musig und Ambiente si wider genial gsi! Das ganze isch imene Antiquitäte-Lade u mega Stilvoll igrichtet. Het immer Livebands wo spile, usw. Genial! I gloub dene Beide hets o gfalle! U d´Manu u i hei du o no chli versuecht ds Tanzbei ds schwinge! 🙂 Si het das natürli anders im Griff… aber ha mir also müe gä u sooo schlächt ischs gloub nid gange! 😉 Am nächschte Tag si mir du der Zuckerhuet ga aluege. D´Ussicht vo dert obe abe isch der Hammer! Het mir besser gfalle als der Christus, obschons weniger höch isch. Aber i dänke, we me mau in Rio isch, isch beides ein muss. Drum si mir du derna o no ufem Christus gsi. Für mi zum 2. mau. Am Abe si mir du wider ga ässe. Das mau hets Japanisch gä! Isch schwär gsi zum ässe (ömu für mi! :-)), aber sehr fein. Derna si mir am Strand imene Beizli no äs feins Käfeli ga ha. Der letscht Tag mit dene Beide si mir no chli id Innestadt. Dert hei mir paar vo de Gebäude us mim Reisefüerer agluegt u si derna mitemene sehr altertümliche Bähnli uf Santa Teresa ufe (äs Künstlerviertel hie in Rio). Die Fahrt het mir mega gfalle. Das Bähnli het stil u ä bsundere charme, wie o das Viertel. Derna si mir no ga shope i eis vo dene zahlriche rise Shoppingcenter wos da het. Am Abe si mir ines typisches Restaurant hie i der nöchi ga ässe. Die “per Kilo” Restaurant, wie si ne säge, gits hie wie Sand am Meer. Das heisst eifach Buffet bis zum abwinke! 🙂 Nach däm si mir am Strand zum Hotel vo dene Beide zrugg gloffe. Zersch hei mir no dänkt für nachem Chueche (wos no gha het) und Kafi, chli witer i Usgang ds ga. Hät no ä Rock and Roll Club usfindig gmacht gha. Aber ds Käfele isch so gmüetlech gsi, das mir im Hotel blibe si u no bis spät id Nacht plöiderlet hei! 🙂 Isch o sehr schön gsi! Am Tag druf isches du nachem ds Morge scho los a Flughafe mit dene Beide. Bi mit gmischte Gfühl gfahre, denn einersits hät se gärn no chli da bhalte wüu mirs immer so guet hei u anderersits hani mi mega für die Beide gfreut, das si hei chöi zu irne Lüt! Für mi wär die Zyt itz sicher no vil chürzer gsi mit dene Beide. 🙂 Aber i freue mi o scho mega, we i de cha ga u euch dehei alli wider cha träffe!! Vermisse nech mega u freue mi extrem für wider hei ds cho! I wirde grad da in Rio blibe u hie d´Sunne no chli gniesse, bis i de Flüge. Das isch es mau fürs erschte, denn i mues itz los zu der Ana, mir gö no zäme chli ad Beach u derna ga ds Nacht ässe.

Bis bald. Liebi Grüess a alli

Salvador zum letzten!

March 4th, 2007

Das mit mim plante Flug am 22. i der Nacht isch du nüt worde! Hei die doch tatsächlich alli buechige la platze! Na ja…. e Flug hets du glich no gä, allerdings ersch am 23. u einiges türer! Aber äbe, was wott me da mache. Ha immerhin ä Nacht gratis im Hostel chönne blibe, denn das isch der glich Typ gsi, wie dä wo mir füre Flug gluegt het. Allerdings isch Prisdifferenz zum Flug dütlich meh gsi! 😉 Ds Hostel isch übrigens für die Nächt nachem Carneval vo 93 uf 20 Reais abegheit mitem Pris! I ha der 21. am Abe im Hostel no chli Kartespiel gmacht mit 2ne us Canada und em Hostelboy! Isch no luschtig gsi! U da i der 22. o no der ganz zur Verfüegig gha ha, bini am Mittag eis dick go ässe! Dert het mi äs iheimisches Meitli immer so fründlich aglächlet, so das i du schlussändlich mau ds Gspräch gsuecht ha, obschon mis portugisisch sehr sehr beschränkt isch. 🙂 Mir hei du abgmacht für am Abe eis ga ds trinke, nach irem Firabe. Ha dänkt das wär no ä charmanti Art ä chli portugisisch ds lehre! Allerdings isch nüt us däm träffe worde, denn si isch nid uftaucht! Hmmm… ha mi du gfragt ob äch öppis passiert sig, denn i ha nid der Idruck gha, das si würd Manne verarsche. Allerdings hani mi da offebar schwär tosche! 🙂 Denn i bi am Morge bevor i gange bi, no schnäu ga luege ob si am schaffe isch… siehe da, si isch wohl uf gsi! Si het nur gmeint, si heigs voll vergässe und es tüeng ire ja sooo leid, usw.! Na ja…. wärs gloubt! I wär ire sicher nid bös gsi, we si vo Afang a nei gseit hät! Aber so het mi du das scho chli möge! Der Hostelgiel het gmeint, das sig da normal u zeig, das si nid würklech interessiert sige! Na ja… das chönnt me o eifach säge! U vorallem ha i ja nur eis wöuä ga trinke u chli portugisisch lehre! Aber äbe… I bi du no öppis chlises ga ässe a däm Abe u derna zytig is Bett. Der Flug isch fuer einisch relativ pünktlich los. Nur ä halb Stund verspätig! A Flugehafe bini mitem Typ vom Hotel. Är het ä guete Pris gmacht fürs bringe. Das ischs also gsi us dere eher gfährliche Stadt! Meh de us Rio, wonis bis itz super guet ha us mir sehr gfallt!

Liebi Gruess a alli

Carneval zum 2.

February 20th, 2007

WOW! Das isch e Sach da!!! UNGLOUBLICH!! Wär scho mau a der Streetparade isch gsi, cha sech vilich äs Bild mache, wis hie cha usgseh. Allerdings nid so, NEI! 🙂 Es isch ca. dopplet so voll mit Lüt u het 3 Umzüg! Eine dervo vilich 3/4 so läng eine ca. 1,5 mal so läng u eine ca. 2 mal so läng isch wie die ar Streetparade! Im chline Umzug, hets keni grosse Lastwäge, nur grossi Musiggruppene u dä isch eher chli Tradizioneller. Die grössere 2 hei Giganteschi Lastwäge u si mit eher modernerer Musig u chli verschidenem Underwägs. Shows wie me se vo Rio här kennt usem TV gits hie nid würklech. Das isch Carneval fürs Folk! Aber genial!! Es si alli uf der Strass, vom Chlichind (für mi unverantwortlich i dere Mönschemasse u däm Lärm) bis zum Grosi, bzw. Grosätti. Ghörschutz kenne die hie nid! I bi gloub der einzig Mönsch gsi hie mit Ghörpfropfe. Bi o paar mau druf agsproche worde, sigs wüus sis nid verstande hei oder wüu si gärn gha hätte! Es isch für mi no mit Pfropfe sehr Lut gsi! Regle gits da äuä nid. D´Militärpolizei isch sehr presänt u o sehr aggressiv! Wenn da nid grad Platz machsch, de gits eis a Grind! U nid grad zärtlech, denn die Type si gloub alli usem Kloninstitut, sprich mindeschtens 1,90 u relativ kräftig baut! 🙂 Na ja… isch vilich besser so, denn hie hets sehr vil guet bauti Männer! Die si übrigens glich interessiert a de Europäerinne wie iri wibleche Pendent. Mitem Underschid, das d´Männer besseri Bodys hei, als d´Froue da! Bi chli enttüscht…. ha mir meh erhofft! 🙁 Argentinie gfallt mir vil besser, was das ageit! I ha übrigens no ä Raub eis zu eis chönne miterläbe. I bi vorgeschter (18.) mit 2 Chilene (Mueter u Sohn) underwägs gsi, woni im Hostel kenne glehrt ha. Der Sohn isch für einisch grad nid sehr nöch bi üs gsi u woni zrugg luege, het ne grad ä schwarze 2m Ris im Schwitzchaschte u nimmt im s´Gäld usem Hosesack. Ha grad zrugg wöuä ga hälfe, da lat är scho wider los u verschwindet i der Mängi! Zu schnell gsi! Na ja… si gloub so um di 20 Real, 12 Franke gsi. Nid so tragisch gsi. Aber für d´Mueter isch ä halbi Wält zäme gheit! Na ja… x Stund später het o si sech mitere Tablette wider chli beruhiget gha! Cha halt passiere, weme ds Gäld so im Sack umetreit. Itz wüsst dir sicher o, würum das i keni Fotos wirde lifere u nur ohni Kamera use ga! I bi übrigens nach mim erschte Abe i däm Bloc (afro-brasilianischi Drummergruppe), grad krank worde! Isch äuä wider eis chli ds vil gsi, nie richtig schlafe u immer vil undernäh usw. Jedefalls hani du am Tag druf nur gschlafe u ds Fieber usegschwitzt. Ha mir o d´Blase oder d´Harnröre chli entzündet gha, das die ganz Nacht grägnet het u alles völlig dürnesst isch gsi. Es isch aber mittlerwile alles wider i beschter Ornig. Am Samschtig bini du ad Strandparade. Dert bini no nid hundert pro zwäg gsi u drum froh gsi, hani ds Ticket gha für ufene Tribüni! Das isch super gsi, für eis ä Idee ds übercho, wie gigantisch das das alles isch! Bi du trotz däm das i nid so super zwäg gsi bi,ersch am halbi 6i am Morge hei cho! 🙂 Geili Fete gsi! Am Sunnti bini wie gseit mit dene beide vo Chile underwägs gsi. Mir si der 2. gröscht Umzug ga luege, bzw. ä Teil dervo, nachdäm mir am Strand unde no imene schöne gmüetleche Restaurant eis si ga zie! U geschter isch die Ultimativi Party gsi bis itz! I bi im Bloc EVA underwägs gsi! Hammer Musig, geili Lüt, perfekt! Ha da ä Gruppe Schwyzer (Rene mit der Fründin us Salvador, Heidi, Roman, Thomas, u der letscht Name hani leider vergässe, sorry.) kenneglehrt wonis mega guet ha gha! Falls mau öpper vo euch uf die Site stosst im Zämehang mitem Carneval vo Salvador 2007, de mäldet euch doch!! Wär mega cool! Hüt hani itz wider lenger gschlafe u bi afe chli im Internet ume ghanget. U am 22. i der Nacht, geits de witer Richtig Rio. Dert erwartet mi de hoffentlich mini Kollegin Ana, woni usem Zug vo Aguas Calientes nach Cusco in Peru kenne glehrt ha. Si het Ferie u het mi zu sich iglade. Si wott mir Rio zeige! 🙂 Freue mi scho druf, denn mit Iheimische isches immer besser als alei! Wär also mau 7 Tag Party pur wott erläbe…. chömet a Carneval uf Salvador! 🙂

Bis bald. LG a alli

Salvador zum 1.!

February 15th, 2007

Da het doch alles mau ganz guet klappet! 🙂 Bi pünktlich gfloge u acho, d´Hotelreservation het verha,… So wott mes doch ha! Aber wie chönnts o anders si, äs chlises Missgschick isch o derbi gsi, denn i ha vorem Abflug müesse merke, das i doch der Schlüssel vo mim Hotelzimmer no ha im Sack gha! 🙂 Na ja… i hoffe är chunnt irgendwenn zrugg zu de Bsitzer! Ds Stedtli hie in Salvador isch rächt schön, was i afe so gseh ha! Wie i mim Buech beschribe, isch das ä risegi Partystadt! 🙂 Es hei sech d´Strasse bis itz all Abe gfüllt u überallhär hets Musig gha u Lüt uf de Strasse am tanze! Es nimmt mi ja itz de Wunder, was hüt Abe bim Carnevalstart los wird si! 🙂 I ha äs T-Shirt gschänkt übercho vom Hostel für hüt Abe imene sogenannte Bloc mit ds ga. Das si Lastwäge mit Lutsprächer u Tänzer/inne druf, wie mes öppe vo de Streetparade kennt. Hinderdranne tanze när alli wo äs Shirt kouft hei imene Abgsperrte Block! Dä Bloc hinech isch ir Innestadt. Die T-Shirts choschte je nach Gruppe zwüsche ca. 80-800 Reales pro Tag! Mega türi Sach! I Franke si das zwüsche 40-400! I ha itz no ä Sitzplatz ufere Tribüni ar Beachparade für am Samschtig Abe reserviert (160.- R) u ä witere Bloc vo de bekannte Gruppe EVA am Mäntig (250.- R). Was i de süsch no wirde mache, weiss i no nid so genau! Vilich versuechenis de o no eis eifach so uf der Strass. Mau luege wie vil das me da gseht u wie me das erläbt. Oder eventuell o no i eim vo de zahlriche Partylokal, wo si diversi Gruppene mit irne Shows zeige! Bilder vo da wirdeni keni chönne lifere, denn mit der Kamera ume ds laufe isch ke gueti Idee! 🙁 Leider! Mi Zimmergefährt, woni am Afang gha ha, isch scho mit der Pistole überfalle u usgsacket worde! Das ganze am hällliechte Tag am Strand mit vil Lüt ume! 🙁 Na ja… Aber i wirde mir bestimmt nachem Carneval ä DVD choufe, damit i mi a alles lebändig wirde chönne zruggerinnere! 🙂 Me de wider nachem grosse Fescht! 🙂

LG a alli

P.s. Manne, we dir uf schwarzi Froue stöht, de gits die niene ringer ds ha als da! Bi scho am erschte Abe vo diverse extrem agmacht worde! Mi Fall ischs aber nid! 🙂

Iguacu!

February 12th, 2007

¡Hola Amigos!

Das isch itz der letscht Itrag us Argentinie. Vorewäg chani scho eis säge, das es absolut überwältigend isch, was i hie ha chönne gseh u erläbe!!! Eifach TRAUMHAFT!!! Es fallt mir sehr schwär das i Wort ds fasse, denn das Gfühl wo eim überchunnt, weme da vor dene Wassefäll steit isch eifach WOW!!! Mir fähle schlicht die passende Wort für das alles nöcher ds bringe. Lueget nech doch de d’Bilder a, sobald das i die cha ufelade! U vorallem, wenn dir je Glägeheit heit, so bsuechet das Land u vorallem Igacu, es isch äs Traum!!! Itz aber derzue wis mir da süsch no so gange isch…. Wie der ja scho wüsst, bini mit Verspätig acho, da i ja später los bi in Buenos. Am Flughafe het mi du ä Österricher agsproche, wo mi schins in Buenos im Hostel gseh het. Är het mi gfragt ob i reserviert heig u i ha müesse verneine! 🙂 Das isch ihm spanisch vor cho, denn das pass gar nid zumene Schwizer! Was het de dä für Schwizer troffe? Das kenne doch no anderi, oder nid? 🙂 Jedefalls het är äs super cools Hostel reserviert gha. Also bini o dert zum Bus use gange zum frage ob si Platz hei! Das isch aber nüt gsi. U da dert no me si Usgstige, het sechs ergä, das d’Amanda us Australie o dert gstande isch ohni Zimmer. Also hei mir äs Taxi id Stadt teilt u si zäme ufene längi Suechi!! 🙁 Es isch cho wis het müesse cho, mir hei imene sch… Hostel äs Plätzli gfunde, für si im Mehrbettzimmer u für mi im Gang usse! 🙂 Na ja… immerhin ä Madratze! 🙂 Am Morge “früe” (wen wunderts) druf si mir du i triefender Hitz, hie isch nämli no wermer als ds Buenos, ga äs neus Hostel sueche. Ä Frou usem Peter Pan Hostel het gseit es heig de sicher äs Plätzli, sobald am 10i der Check Out düre sig, also hei mir üsi Rucksäck dert gla u hei ire vertraut. Derna si mir i üses Parnterhostel vo däm vo geschter Nacht, das dert ds Morgeässe gä hät. Das hei mir du la si u hei eifach der Koin us Holland, wo mir vom Vorabe usem gliche Hostel bim Grillplousch kenne glehrt hei, mitgno für zu de Igaucu Wasserfäll! Mir si mitem Bus häre (8 Pesos) u hei dert der Parkitritt (30 Pesos) zahlt. Derna si mir mitem Bähnli zum gröschte Wasserfall (Tüfelsfäll), wos mir zerscht mau d’Sprach verschlage het. Nach längerem und x-Fotos si mir du mitemene Böötli zrugg zum Usgangspunkt vo de witere Wäge. Uf der Bootsfahrt hei mir no Krokodil, Schildkröt u diversi Vögel gseh. Usserdäm wimmlets hie vo bunte Schmätterlinge i allne farbe u grössine! Wunderschöni Natur o näb de Fäll! Vo dert us hei mir du der sogenannt ober Pfad begange, wo für mi der schönscht isch uni zu mim Lieblingsplatz erklärt ha, vo wo us me ä super Überblick über die meischte Fäll het. Woni das gseh ha, hets mir ds 2. mau d’Sprach verschlage! U das isch würklech so! Die wo mi chli kenne wüsse, das i no nie ufs Muul gheit bi gsi u i cha nech säge das i sit i underwägs bi no mau zuegleit ha, aber da het mir d’Sprach gfählt!! Ha se aber ume! 😉 Nachdäm si mir ufe under Pfad, wo mir no mau paar Fäll gseh hei u vo wo us mir ä chlini Bootstour gmacht hei. Die isch super gsi, aber vil ds churz. Uf dere ischme mitem Boot bis id Fäll ine gfahre u seich Nass worde, was bi dere Hitz ä absolute Traum gsi isch! 🙂 Mir heis alli 3 mega gnosse us luschtig gha. Ufem Rückwäg hei mir no paar angäblich bissegi Tierli gseh! Die hani 2 Tag später in Brasilie chönne alänge u strichele! 🙂 Derna hei mir no chli zyt gha bis der Park het zue ta u mir si no eis ufe ober Pfad, wo mir äs guets Plätzli gfunde hei zum relaxe mitere super Ussicht ufd Wasserfäll. Derna si mir vomene Parkwächter eher unfründlich zum ga ufgforderet worde, was mir du o gmacht hei, wo mir der Koin ändlech wach gha hei! Dä isch nämli igschlafe u der Wächter het ne nid wach übercho! 🙂 So si mir wider im Bus zrugg. Derna hei mir i üsem neue Hostel wöuä ichegge…. wöuä!! 🙁 Leider hets aber ke Platz gha, da schins nid gnue Lüt use sig u si no Reservatione gha heige vor üs! Super! Irgendwie het das das nätte Meitli am Morge äuä vergässe ds erwähne! Na ja… es isch du glich no guet cho, denn ä Ma wo dert schaffet het ä Fründ gha, wo ersch grad äs Hotel ufta het, u dä het no jede Menge Platz gha! Itz dänkt me es sig de sicher nid so das gsi, aber däm isch also nid so. Es isch ä gueti Underkunft, wenns o a allem andere no chli manglet. Aber mir si froh gsi hei mir öppis gha! 🙂 U derna si mir wider der Koin ga abhole zum Nachtässe. Es isch du no ä Israeli (vo dene hani itz de d’Nase gstriche voll!) mitcho. I ha du ihn vermuetlich nid so nätt behandlet der ganz Abe, aber är het sech sehr Müe gä ds Bild vo ine wider ds verbessere! Allerdings isch ihm das o nid glunge! 🙂 Na ja… chasch nid immer gwinne! Jedefalls hei mirs trotz allem sehr luschtig gha. Am nächschte Morge si mir 3 du wider i Nationalpark. Das mau si mir ane Wasserfall mitte im Dschungel gloffe, wo mir hei chönne ga Bade! Soooo schön gsi u het sooo guet ta, ä Tag chli ds relaxe. Nachdäm mir irgendwenn du mau gnue gha hei, si mir no eis ufe ober Pfad gange u hei dert ds Schauspiel no chli gnosse bim UNO spile, bis der Koin het müesse ga, da är ufe Nachtbus nach Buenos isch. Denn är isch am Tag druf vo Buenos nach Ushuaia gfloge. Also si mir relativ zytig wider zrugg. Am Abe het du d’Amanda no Kolleginne us Australie wider troffe. Die si mir chli komisch ine cho u i bi so müed gsi, das i mau früe is Bett bi. Am Morge si du d’Amanda u i uf die Brasilianischi Site i Nationalpark ga d’Wasserfäll aluege. Das isch allerdings nid so guet wie me ghört oder list. Denn äs söu schins schöner si als vor Argentinische Site. Mir si üs aber einig gsi, das es das bestimmt nid isch! Üs hets vil besser gfalle ds Argentinie u me gseht ds Brasilie grad mau öppe 2, 3 Fäll wome vo Argentinie us nid cha gseh. U etlechi wome ds Argentinie gseht, gseht me ds Brasilie nid! Na ja…. es isch glich sehr schön gsi, denn d’Natur isch eifach überwältigend! 🙂 Nach dere eher churze Tour hei mir am Flughafe in Foz do Iguacu ä Halt igleit zum mis Ticket nach Salvador organisiere, was o klappet het! Juhuu, es geht zum Carneval!!! 🙂 U am Abe zrugg si mir no mit de beide Fründinne vo der Amanda ga ässe, bzw. mir 2 nur trinke. Da het sech du mi negativ Idruck witer vertieft u i ha guet verstande, wiso das d’Amanda mau fürne Wuche alei greist isch. Die beide hei Tisch u süschtegi Maniere… na ja… nid vertiefe. 🙂 Am Morge isch du d’Amanda ufene Adventure Trip u i ha Usgschlafe u mir ä gmüetleche Tag i der Stadt gmacht. Chli Internet, chli Sunnebedele u am spätere Nami d’Amanda verabschide, denn si isch ufe Bus nach Floreonapolis. Am Abe hets du no äs BBQ gä imene härzige Restaurant i der Nöchi. Allerdings hät i mir gloub besser ä guete Biz Fleisch usgsuecht, als der gmischt Grill gno! 🙂 Aber na ja… me hets abe bracht u ds Dessert hets grettet! 🙂 U eigentli hät i im Sinn gha derna eis ga ds lige… aber äbe… wis so isch, hani no müesse Gäld ha u bi drum no is Zentrum abe. De geit me doch no ufenes Schlummertrünkli nid wahr! 🙂 U wis cha cho, isch i dere Bar no tanzet worde u i ha no äs Meitli gfunde, wo mir das alles chli bibracht het, da si Tanzlehrerin isch, wenn schins o für anderi Tänz. Aber die het das so guet gmacht, das die andere chum zum stuune us cho si u i ersch rächt nid! 🙂 Has doch rächt schnäu begriffe u es het mega gfägt. Drum isch du o grad sofort wider 4i am Morge gsi! U wis hie so isch, hani mi fasch müesse schäme, das i scho hei bi! 🙂 Na ja… wirde äuä Alt! Hüt hani lang gschlafe, bi chli im Pool gsi u versueche itz mau no paar Bilder ufe ds lade. Wirde hinech bestimmt o no eis ä feine Biz Fleisch ga Ässe unes guets Glesi Argentinische Wy näh, bevors de Morn Morge am 10 ab 4i nach Brasilie a Flughafe geit! Das isch es also gsi mit spanisch!! 🙁 Itz gits de no chuderwälsch u schlächts änglisch! 🙂 Na ja… irgendwie wird das de sicher o ga! 🙂 Me de also ds nächscht mau us Brasilie, weni das no schaffe nachem Carneval! 🙂

¡Espero que nos vemos pronto a la casa! ¡Saludos y abrazos a todos!

Ralph

Buenos Aires

February 10th, 2007

Hallo Zäme,

scho gits wider ä mega länge Bricht! 🙂 I chume eifach nüm is Internet i der letschte Zyt! Aber das isch ja o guet so! 🙂 Also, i bi nachemene wider verspätete Flug guet in Buenos Aires glandet. Allerdings hani fasch ä Hitzeschlag erlitte, denn äs isch am 5i am Nami immer no 40 Grad gsi! Nachdäm i mir äs mega türs Taxi id Stadt gno ha, bini vo däm no bim falsche Hostel abglade worde. Das heisst i ha nachere halbstund astah a der Reception müesse erfahre, das das nid das Hostel isch, woni der Andres ud Noemi wider ha wöuä träffe. Also hani mi mitem ganze Gepäck ds Fuess ufd suechi gmacht! Has du nach längerem o gfunde. Leider hets ke Platz gha u die beide si o nid ume gsi. Also hani ine ä Nachricht hinderla u bi mir äs anders Hostel ga sueche. Ha du eis gfunde i der Nöchi. Später hanis no eis versuecht bi dene zwöi, aber das isch nüt gsi. U da ds Natel irgendwie nid so wott da in Südamerika, isch das o nid so gange wis hät söuä mit der Kommuniktion über dä Wäg. I bi du für mi no öppis ga ässe im Restaurant näb üsem Hostel. Das isch ä super feine Wok mit Poulet gsi! Am nächschte Morge hani die beide o verpasst, da i bis am 10 pfuset ha, obschon mega schlächt, das so super heiss isch gsi. I bi du afe chli dür Stadt zöttelet u ha mir äs erschts Bild gmacht vo däm ganze. Allerdings isch das wie i vilne Grossstädt für mi eher negativ usgfalle! Obschons fasch keni Lüt gha het, das Sunntig gsi isch u alli Gschäft gschlosse gha hei! Die Vorschusslorbeere wo Buenos übercho het vo vilne Lüt underwägs, ha i niene chönne gseh! Am Abe hani de versuecht die beide erneut ds träffe, was aber o nid klappet het, obschon i am Morge wider ä Nachricht hinerleit ha im Hostel vo ine. Na ja… mängisch söus halt nid eifach ga! 🙁 I ha du im Hostel d’Paula us Chile troffe. Mit ire hani chli über Gott und die Welt plöiderlet. Derna hani für d’Manuela ud Evelyne, wo i der nacht druf nach Buenos gfloge si, gluegt ob i äs Hostel finde. Si hei äbe ke Internet gha u nach mine Erfahrige isch der Momänt eifach besser ds reserviere! 🙂 Da chunnt de no ä Stori vomene andere Ort! 😉 Da si bi mir im Hostel nüt gha hei, hani mau ä Liste gmacht mit mögliche Hostel i der Nöchi, damit i de am Morge ufd suechi chönnt. Allerdings hani die nid brucht, da i am Morge nomau gfragt ha, bevor i mi ufd Suechi gmacht ha. Und siehe da… Glück gha, denn äs het äs Päärli am Morge früe unerwartet ustschegget! Also hani das Zimmer reserviert für die 2 Nächt wo si mögli gsi. Derna hani mi wider id Stadt gmacht u ha mau chli meh abklapperet. 🙂 Bi underwägs o no ines Museum u ha ä Markt bsuecht, usw.. Aber irgendwie hani mi immer no nid chönne für die Stadt begeischtere. U am Nami isch die ganzi Fuessgängerzone zu mim erstuune fasch läär gsi… komisch! Aber das isch hie schins so, denn Gschäft hei alli zue zum Siesta mache bis am 5i. Nur wenegi si offe gsi. Also scho wider nüt mit Internet. Das isch nid mau me i üsem Hostel gange, denn die hei ä Panne gha! Am Abe hani du ändlech der Andres ud Noemi wider troffe! Si si i irem Hostel gsi! I bi du nacheme churze Bsuech bi ine, is mis Hostel zrugg gange, zum luege ob alles klappet het mitem Flug vo de andere Beide u ob si guet si acho. Das het alles wunderbar klappet u mir hei näbe im Beizli no äs Schlummertrünkli gno zäme. Dert hei si no Livemusig gha. Am Morge hei mir üs, d.h. d’Manu, Ev u i, ufe Wäg id Stadt begä. Bi mit ine richtig Recoletta gloffe. Underwägs hei mir ä gueti Tangoshow gseh u si derna no ine Chile, wo du grad d’Mäss agfange het. I bi also sit Jahre wider eis ir Chile gsi u das ersch no Katholisch u uf Spanisch! 🙂 Interessant gsi. Am Abe hei mir bi üs im Hotel uf der Terasse im 5. Stock ds Nacht gässe miteme super feine Brot, Chäs, Schinke u Wy! Das isch wider eis gsi wie deheime! 🙂 Het guet ta! Da ischs du o cho, das mir no Tanzunderricht gä, bzw. gno hei gägesitig! 🙂 Sooo luschtig gsi, denn äs het niemer me würklech ä Ahnig gha usser vilich grad der Manu! Aber es het gfägt! U mir heis einigermasse zäme bracht! 🙂 Nachdäm die beide is Bett si, hani du der Andres no troffe, wo mit mir no i Usgang wöuä het. Allerdings isch scho Morge am 3 gsi, woni ihn du mitere völlig frömde wo üs im Hostel agsproche het, ha la zie für no ga Tango ds tanze. 🙂 I ha würklech nüm möge, da i die letschti zyt nur wenig u schlächt gschlafe ha! Am Morge hei du die beide äs neus Hostel brucht u mir si mau ids erscht beschte vo dene woni mir usegschribe ha ga luege. Und siehe da, mir hei Glück gha u si hei äs Zimmer gfunde für die 3 Nächt wo si no in Buenos gsi si. Drufabe si mir du ine grössere Park, wos Seeli hät söuä ha. Mit betonig uf hät, denn die si alli ustrochnet gsi! So hets du süsch ä gmüetleche Spatziergang gä. Später am Nami si mir alli no ga schlemme, da mir alli ir Heiwehkrise gsteckt si. U da das nid gnue gsi isch, si mir no grad zum Coiffeur! 🙂 Am Abe si mir du ä gueti Tangoshow ga luege! Allerdings o Schweineteuer! Mit ässe hei mir alles i allem ca. 80 Dollar zahlt pro Person! Für üs wärs sicher nid vil, aber me gwöhnt sech halt a die Prise da! Aber isch u schön gsi u i ha sogar dörfe ga tanze! 🙂 Das isch mir fasch nid pinlich gsi, denn da i keni länge Hose gha ha (i der Wösch gsi). So het das mit churze Hose i Turnschue sicher ganz guet zum super schöne Abekleid vo dere schöne Tangotänzerin passt! 🙂 Na ja … chasch nöd immer günne! 🙂 Immerhin hani zwöi super hübschi Begleiterinne gha! 🙂 Das isch o äm Türsteher und am Pianospiler ufgfalle, denn die hei die beide nachem verla vom Lokal no iglade für am Mittwuch Abe no mau GRATIS ds cho! Nid schlächt! 🙂 Derna si mir no ine Bar eis ga trinke. Allerdings isch das nid so der Hammer gsi, das mir gli richtig Hei si. Underwägs bini vo vilne so komische Type für Gäld aghaue worde. Alles isch chli mulmig gsi. Der eint het sogar no dergliche ta, als hät är ä Pistole imene Plastiksack, damit är vo mir Gäld hät übercho. Na ja… zum Glück hei das die beide Froue nid so mitübercho, da si nid würklech vil spanisch chöi. I ha die beide no heibegleitet u ha du us Sicherheitsgründ mau der Fotoapparat bi ine gla. Ha aube nid so Angst ums Gäld, aber d’Fotos würde mi mega reue! Bi aber guet hei cho. Am Tag druf, hei mir alli chli d’Heiwehkrise gschobe u hei drum nid so vil undernoh. Mir si underanderem no ga luege wäg üsne Flüg. Si hei ire Flug no müesse zahle u i ha müesse wüsse a welem Flughafe das mine abflügt. Mir hei nur grad 2 Stund gwartet, bis mir das i 5min erlediget hei gha! 🙁 Sooo müesam! Nach däm allem si mir no i Botanisch Garte. Derna hei mir üs wider ds z’Nacht kouft u hei das mau no bi ine uf der Terasse gässe. Mir hei no mau chli tanze güebt u si derna is Kino go “Eine Nacht im Museum” luege. Isch änglisch gsi mit spanische Undertitel! Voll geile Film! Mir hei rächt müesse lache. Nach der Rückkehr is Hostel vo dene zwöi, hei si leider müesse feststelle, das ine 2 Täschli mit Kreditcharte usw. fähle! Das het du üsere heitere Stimmig nid so guet ta. U under dene Umständ, bini am Morge gar nid gärn abgreist. Si si mi imHostel cho abhole u hei mi a Flughafe begleitet. Immerhin hani ine no chönne hälfe, da der Flug scho wider verspätig gha het, das si ä Verluschtmäldig übercho hei vor Polizei am Flughafe. Na ja… nachemene Käfeli hani du dene beide scho wider Goodbye müesse säge! Het mi mega hert gha, denn mir heis so guet zäme, das i mi chli wie dehei gfühlt ha, weni mit ine bi zäme gsi! 🙁 U meh gits de gli vo da us Iguazu. Es isch der absolut Traum hie, so vil vorewäg!

¡Hasta la proxima y la ultima en espagñol!

Ushuaia!

February 4th, 2007

So, da si mir itz also, i der nächschte Millionestadt, in Buenos Aires u hei so um di 40 Grad! 🙂 Ä mega Gägesatz zu Ushuaia, woni ds letscht gsi bi. Dert isch eher kalt u rägnerisch gsi über die ganze Täg i. Vo Calafate us bini mitere guete Stund Verspätig in Ushuaia glandet u ha zersch mau ä super schöne Idruck gha vom däre Umgäbig da, denn es isch äs herrlichs Wätterli gsi u 17 Grad. Also für die Gägend quasi perfekt, eifach so, wies när die ganz zyt nüm gsi isch! 🙂 I bi mitem Taxi zum Hostel gfahre, woni mir scho länger reserviert gha ha u ha dert der Tag loker la usklinge. Nachemene chline Nachtässe, bini no mit paar neue Bekannte eis ga trinke ine gueti Bar. Allerdings nid allzu lang, da i wider eis rächt müed bi gsi. 🙂 Bini irgendwie no vil i der letschti! Komisch! 🙂 Am Tag druf bini mit der Efrat us Israel wo mi bim warte ufe PC agsproche het u der Claudia us Dütschland, äre Bekanntschaft vom Vorabe zum Gletscher hinder der Stadt ufe gloffe. Ä schöne Usflug gsi, aber het mir chli ds dänke gä, was d’Israelin u iri Marschfähigkeite agange isch. 🙂 Eigentli hät i dänkt die sig sech das de öppe gwöhnt, denn wie fasch alli Israelis het sie o grad ds Militär beändet u isch am Reise. Vo dene hets hie der Momänt im Fall wie Sand am Meer! U beliebt sie si gar nid öppe, denn si träte immer i grössere Gruppe uf u si rise Radaubrüeder u Schwöschtere. 🙂 Aber sie sälber si mega überzügt, das se d’Argentinier sehr gärn hei! Am Abe hani mir du chli Pastas gmacht u mau ä Fläsche Wy trunke. 🙂 Irgendwie het ds erneute allei umereise i mir chli Heiweh usglöst. Wahrschinlech hets mi ds fescht a mini Fründe erinneret, woni mit der Manuela u der Evelyne underwägs gsi bi, da mir üs so super verstande hei! Am nächschte Tag, hani mi du aber scho wider chönne freue, denn die beide hei dürnes Missgschick iri Plän chli gänderet u hei früecher uf Ushuaia wöuä cho, als erwartet! 🙂 Am nächschte Tag bini wider mit der Efrat underwägs gsi. Mir si ga ds Stedtli aluege. Si het extrem der Aschluss a öpper gsuecht u het unbedingt wöuä Lüt kenne lehre wo si mitne cha witer Reise. Die het nid chönne alei si u het mi chli turet. Am Abe hani mir no mau Pastas kochet u wider chli Wy trunke. 🙂 Dä cheib isch eifach der Hammer da! Bim Nachtässe hani du no miteme Basler plöiderlet, wo da mitem Velo underwägs isch. Wüu mi d’Efrat chli turet het da si nid cha alei si, ha se de am Tag druf zum wandere mit i Nationalpark gno. Aber das hät i gloub besser nid gmacht. Mir hei ä chline Bärg bestige (950m oder so). Mues säge, es isch scho rächt ufe gange, so direkt vom Meer us, aber für üsi CH-Verhältnis doch nid allzu extrem. Es isch für mi, obschon i o nid der extrem Wanderer bi ä mega müesami Tour gsi. Underwägs hei mir no 2 (Australie u Schottland) troffe wo mit üs si ufe gloffe. Die Beide Froue hei du churz vorem Gipfel ufgä, das het agfange Stürme u Schneie u si zrugg gloffe. Mir beide Polizischte, der Schott isch nämli o eine gsi :-), heis doch no müesse mache bis ufe. Wo mir du retour Abe grennt si, si die beide Froue scho fasch erfrore gsi u mir hei mit ämene Notchocher vom Schott Suppe gmacht u hei die beide Froue so guets gange isch wider chli ufgwermt, bevor mir de der letscht Abstieg gmacht hei. Dä het extrem lang duret, da d’Efrat eifach nid cha loufe (weder ufe no abe!)! Wie übrigens alli Israeli underwägs nid! 🙂 Sälbscht d’Manne, wo nachem Militär wo angäblich öppis vom hertischte uf der Wält söu si, ke grade Schritt vore ander bracht u hei sech überall halb hei häre knöilet, wenns mau chli Abe gange isch! Na ja… Dä Tag isch derfür schneller verbi als dänkt, da mir derna nüm am See na gloffe si, wüu mir alli völlig dürnesst gsi si! So het sechs du ergä das mir vorhär si zrugg gsi. So hani du am Abe no für die beide CH-inne (Mauela und Evelyne) äs Hostel chönne sueche, damit si de öppis hei, wenn si da achöme. Denn es isch no so schwär der Momänt, da alles überbuechet isch. Jedefalls hani öppis schöns für die 2 gfunde. Derna hani mir du no chli Fleisch kochet u mir äs Sandwich parat gmacht füre Usflug vom nächschte Tag. U zum ässe, wie chönnts anders si, hets du no der räschte Wy vom Vorabe gä! 🙂 Der Usflug isch zure Insle mit Pinguine gange am nächschte Tag. Isch nid so der Hammer gsi. Ja nu… i ha mi derfür ufe Abe chönne freue, da ja d’Manuela ud Evelyne underdesse si acho. Mir si nach mim Usflug äs Käfeli ga ha, wo mir du no grad 2 witeri bekannti Gsichter troffe hei! Nämli d’Yvonne und d’Andrea, wo mir vo Calafate kenne. Mit ine hei mir du o abgmacht gha, das mir üs nachem Nachtässe (si si iglade gsi) no ire Bar träffe. Mir si also nachemene Zwüschehalt i der Tuschi ga ds Nachtässe u heis wider mega guet gha! Derna si mir no i die Bar, wo mir die beide wider troffe hei. Der Pascha het also sis Harem vo Calafate wider zäme gha! 🙂 U wie der mi ja kennet, hanis mega gnosse! 🙂 Am Tag druf bini wider mit der Manuela u der Evelyne underwägs gsi. Mir hei no dä Strandwäg im Nationalpark abgwanderet, woni vorhär nid ha chönne mache. Underwägs hei mir Lunch gässe. Ds ganz isch sehr schön gsi, obschon ds Wätter nid ganz mitgspilt het. Es het immer wider chli grägelet u isch stürmisch gsi. Am Abe si mir no mau zäme ga ds Nachtässe u i die Bar, wo mir wider uf die beide andere troffe si. Derna hets wider gheisse Abschied nä, denn am Morge bini witer uf Buenos Aires. Allerdings wirde i die beide hie wider träffe, denn si chöme o scho bald nache! Da freueni mi scho druf!

Meh de wider us Buenos Aires. Hoffe dir möget no nache mit dene mega länge Brichte!? Sött gloub wider i chürzere Abständ schribe! 🙂

Bis bald. LG alli

Ruta 40

January 27th, 2007

Der Start het ja mega Agfange! 🙂 Statt wie gseit mitem Bus, isch mi der Guide mitem Auto cho abhole. Also scho mau chli bequemer. 🙂 U dermit no nid gnue…. Im Auto sitze doch scho 2 flotti Schwizerinne! 🙂 Das isch wider eis perfekt los! U i ha mi o grad uf ahieb sehr guet verstande mit der Manuela u der Evelyne, wo beidi us Züri Umgäbig si! Mir si der erscht Tag nur Auto gfahre (guet 800km). Underwägs isch es immer karger u öder worde, was d’Natur ageit. Im Auto hei mirs mega luschtig gha! 🙂 Allerdings isch d’Fahrt trotz guetem PW relativ müehsam gsi. Am Abe si mir im Örtli Perito Moreno acho. Ds Hotel wo die beide underbracht si gsi u mis Hostel si ds gliche i eim gsi. Gäbegi Sach! Vo dert us si mir zäme ga ds Nacht ässe u derna no ine Bar äs Wyli ga trinke. Mit üsne Guides (isch no der Gorge derzue cho, nachdäm mir mitem Daniel da häre greist si) hei mirs mega luschtig gha! Am Morge früe isch es du mitem Gorge witer u der Daniel het sech wider ufe Heiwäg gmacht. Itz si mir o im Büsli underwägs gsi u das mit insgesamt 9 Lüt. Mir si ga Felsbemalige aluege i der Nöchi. Isch sehr interessant gsi u sehr sehr Alt alles. Dert hets du o der Mittagslunch gä, bevors wider nur im Bus witer isch bis mir am Abe in El Chalten si acho. Dert si mir wider ga ässe u äs Wyli trinke. Wirde no zum Alki da! 🙂 Derna bini mit dene beide Froue zrugg i ires Hotel, da i no schnäu i mi Reisefüerer ha wöuä luege woni ine usgleit ha. Der Blick vom Typ a der Reception isch umwärfend gsi! 🙂 Ha du o grad gseit, i blib nur churz! Derna hani no äs mini Spatziergängli i mis Hostel gmacht. Der Stärnehimmel underwägs isch faszinierend schön gsi! Bim Nachtässe hei mir übrigens no ä Komet am Himmel chönne beobachte. Am Morge bini du ufene Wanderig zur Laguna Torre am Fuess vom sälbige Bärg und em Monte Fitz Roy. Dert befindet sich o der Gletscher “Grande”. Na ja… dörft vermuetlich o no ä andere Name ha, obschons der gröscht i der Umgäbig isch! Die Wanderig isch traumhaft schön gsi u i ha am Fuess vom Gletscher mis Mittagspäuseli gmacht, mit Brot u Salami woni mir vorhär kouft ha im Supermarkt. Für die ganzi Wanderig hani 6 1/4 h brucht. Gemäss Karte wäres 8 h gsi ohni die chline Umwäge woni no gmacht ha. Am Abe isch es du mitem Bus witer nach El Calafate. Die Beide Girls si a däm Tag ufene gfüerti Tour u hei ä andere Bus gha als i. Si aber itz o da in Calafate. Der erscht Abe hani du no mini Wurst u chli Brot gässe woni no derbi gha ha. Derzue hani mir äs Wyli kouft, woni när leider ha müesse wäg lähre! 🙁 Der erscht schlächt Wy da! Aber da het äuä öppis mit der Lagerig oder der Fläsche nid gstumme. Jedefalls hani du vom Petr (ä 46 Jährige ex. Tschech u Wältebummler wo Musig macht u fasch nur vo däm läbt) äs Glesli übercho u ihm chli zueglost bim Singe u Musig mache mit sire Gitarre. Bis i du o chli ha mitgsunge! 🙂 Mega gmüetlech gsi. Ä u spezielle Mönsch dä Petr. Cha da nid alles verzelle wo är ds Brichte gha het, süsch geits no länger! 🙂 Der erscht Tag hani am Nami ä Tour zum Perito Moreno Gletscher gmacht. Dert ä optionali Boottour vore Gletscher. Sehr idrücklich wie die Ismasse is Wasser gheie! Ä super gueti, wenn o türi Tour! Underwägs hani d’Andrea ud Yvonne us der Schwyz kenne glehrt. Nachem Nachtässe mit der Manuela und der Evelyne bini no die beide “neue” ga abhole u mir hei alli no chli äs Schwätzli gha i der Beiz, wo mir scho am ässe si gsi. Der Chällner het gloub sine Auge chume me traut…. 4 Froue u i am Tisch u vorhär hei mir no ä Spruch la ga, das sech d’Manu ud Ev nid nur der Salat, sondern o der Ma teili! 🙂 Das isch doch chli vil fürne Macho Latino! 🙂 Nachemene Schlummertrunk hani de die Girls verabschidet. D’Andrea ud Yvonne ganz, denn die si am Tag druf witer uf irere Reis. Die andere Beide hani am Abe druf wider troffe. Sie hei sech ä gmüetleche Shopping Tag gmacht u i bi ufene Schiffsusflug zu diverse Gletscher umene Gletschersee. I däm See hani du o ine müesse, zum erstuune vo 1000 andere Touris! 🙂 Das het du o zur Folg gha, das i itz sicher bi 100 Lüt uf der Feriefotos bi! 🙁 Müesst nid si! Tour isch aber super schön gsi! U für einisch hani o nid der Ussländeritritt i Nationalpark zahlt, sondern der Iheimisch. 🙂 Dä isch grad ä drittel mit 10 Pesos! Am Abe bini du wider mit der Manuela u der Evelyne ga Ässe u ufe Schlummertrunk, bevor i die beide leider ha müesse verabschide, da i hüt uf Ushuaia witer bi! Schad gsi, denn mir hei üs super verstande u zyt isch immer mega schnäu ume! Wär sicher schön gsi no chli mit ine witer ds Reise! Na ja… mir gseh üs wider! Danke für die schöni Zyt!

LG a alli dehei, ha ghört es sig doch no chli Winter mässig worde. 🙂 Gniessets!

Barlioche zum 2.

January 25th, 2007

Die Gägend isch für mi der absolut Traum was d’Natur betrifft! I ha mi hie so öppis vo wohl gfühlt, das i am liebschte nüm witer wär! Aber äbe… es mues aube eis äs Ändi ha, süsch chunnt me zu nüt. Was i hie no so gmacht ha…. vil! 🙂 Bi also am 3. Tag wider ufem Velo gsi, obschon mir der Arsch nachem 1. länge Tag scho chli weh ta het. 😉 Bi du derfür nid allzu wit gange. Ha i der Nöchi der Cerro Otto bsuecht u bi dobe no chli umegwanderet, was mega mega schön gsi isch. Uf der Wanderig bini amene Art Restaurant (vermuetlich vomene Golfclub) verbi cho, wo äuä nur offe isch für Privatfeschtli. Dert hani mi ums Huus gschliche u bi ufere Terasse glandet mitemene sensationelle Usblick über alli Seeä da. U da i ganz alei gsi bi, hani mirs gmüetlech gmacht u chli gsünnelet. 🙂 Derna bini witer gwanderet zum “Biedra de Habsburgo”, amene Felse wo wie ä Burg ufemene strategisch guete Ussichtspunkt isch. O vo dert us hani wider ä mega Rundblick gha. D’Wanderig dert häre u zrugg dür die Wälder da, isch absolut traumhaft schön gsi. D’Wälder si no völlig Natur belasse u alles schint wie imene Märli! Zrugg ufem Cerro Otto hani mir du wider äs mega feins Tortestück gönnt. Am Abe im Hostel het der Luici Spaghetti kochet. Si sehr fein gsi. Mir hei also wider alli zäme gässe u si derna no i Usgang. I ha mi du am Morge am halbi 6i mau glöst u bi ga schlafe! 🙂 Woni am 10i wider uf Piste bi, isch du die letschi grad vom Usgang hei cho! 🙂 I bi id Stadt u ha mir alles für d’Witerreis organisiert. Ha alli Flüg u Transpört bis uf Iguazu buechet. Derna bini no ufe Cerro Catedral gfahre mitem Bike. Das isch so zimli der höchscht grad i der Nöchi. Vo däm Bärg us hani no äs Mini Trekking ufd Spitze gmacht. Dert het me ä schöne Usblick gha, bis uf Chile abe. Ds Downhill derna isch äs mega vergnüege gsi! 🙂 Allerdings o chli gwagt, denn i bi ohni der Wäg uf der Charte ds ha, mau gredi Abe dürne extrem steile Wäg. Aber i bi a mis gwollte Ziel cho, der Lago Gutierrez. U zwar ersch no ganz nöch a dene Wasserfäll woni bi ga aluege. Der Rückwäg het du chli pressiert, da i vor de 8i no im Bikelade ha wöuä si, da i gwüsst ha, das i ds Bike nid wie abgmacht am Mäntig cha zrugg bringe, da i denn am Morge früe witer ufd “Ruta 40” bi. Also hani chli speed müesse mache us has no knapp vorhär gschafft! 🙂 Mir heis du so gmacht, das i mis Bike am Sunntig am Abe ha chönne zrugg gä. Derna bini wider is Hostel zrugg. Am Abe hei si Grillparty gmacht! U wis so isch hie, bini o grad iglade worde, das ja eh gnue gha het! 🙂 Derna si mir wider i Usgang. Stimmig isch allerdings nid so ufcho u drum hani mi du abgseilet u bi no chli anders ga aluege i der Stadt. Es isch du o nid allzu spät worde bi mir, so ca. 4i. Am Sunntig ha ig no derfinitiv die Tour “Ruta 40” buechet u mis Bike abgä. Bi zersch no chli ds Stedtli ga aluege u ha no versuecht mir ä Massage ds gönne. Aber es si alli usbuechet gsi, so das es halt verspannt witer isch. 🙂 Am Abe hani de mitem Luici u no eire chli Spaghetti gmacht, wo no vorig gsi si. Derna bini früe ga lige (halbi 12i), da i am Morge am 7ni bi abgholt worde für uf die “Ruta 40”. Das isch es de gsi vo Bariloche! 🙁 Snif!

¡Hasta la proxima!

News!

January 19th, 2007

I ha d’Fotogallery überarbeitet. Itz findet dir alles nach Länder gordnet i de Subalbum!

Witerhin vil Spass euch allne u vile dank für die vile Bsüech! I freue mi immer wider mega drüber!

LG a alli

Bariloche (zum 1.)

January 19th, 2007

¡Hola Patagonia! Das isch es Erläbnis gsi! 🙂 Nachere mega länge Busfahrt dür Steppeähnlechi Gebiet, hets hie churz vor Bariloche uf einisch agfange wächsle. Ds Gebiet isch vil grüener worde, es het Seeä u Flüss gha… Das het mir scho vom erschte Idruck gfalle. Ca. 20 km vor Bariloche si mir überne Hügel gfahre und da isch du der See und Bariloche uftaucht! Wie imene Märli bini mir vor cho, sooooo schön!! Ha mi grad ufe erscht Blick i die Umgäbig verliebt! U woni du zyt gha ha, ersch rächt! Es isch absolut Traumhaft hie!!! I würd gärn länger blibe, als i cha u alles ga erkunde wo nur möglich isch. Na ja… alles chame nid ha. I der erschte Nacht hani äs Hotel müesse näh, da süsch niene öppis frei gsi isch. Ha zwar so um die 35 Franke zahlt, aber es isch derfür wider eis alles sehr suber gsi u es het äs mega ds Morgebuffet gä! 🙂 Da hani du o zuegschlage! Derna hani mi ufe wäg gmacht i mis Hostel, woni itz bi. Es isch mitte im Zentrum u nid so speziell guet, aber choschte nur 25 Pesos u het vil nätti Lüt da. Mit dene hei mir du geschter Abe o kochet u si zäme Usgange. Ha zwar fasch nüm möge, da i nachem ichegge hie äs Velo bi ga miete u mit däm so knapp 70 km um die Seeä hie gmacht ha! Wirde die ganz zyt hie alles mitem Velo mache. Es isch wunderschön so! Bi o scho ufemene Ussichtsbärg gsi. Die Gägend isch eifach ä Traum!! Allerdings isch es o mega Touristisch, da grad Feriezyt isch in Argentinie umso meh! Me chönnt meine me sig imene Art St. Moritz oder so öppisem i der Schwiz, wenn Hochsaison isch! Prise hie si o däm entsprächend. A jedem Egge hei si o Schoggi-, Ramsch-, Kleiderläde usw.. Was i underwägs o gseh ha, si vil Confi- u Bierfabrike. D’Hüser hie si o absolut Traumhaft u immer schön i die vile Wälder integriert mit Usblick über die schöne Seeä. Sobald i cha Bilder ufelade, wirdeni das mache. Damit dir chli a mire Freud über dä Traumhaft Ort chöit teil ha!

Bis bald. LG us Bariloche

¡Hola Argentina!

January 18th, 2007

D’Reis da häre isch ganz guet verloffe! Mir hei am Zoll o chum ä Minute verlore, da der Chauffeur vo allne chli Chligäld gsammlet het, als bestächig fürd Gränzlüt! 🙂 Undänkbar bi üs, aber hie klappet das offesichtlich! 🙂 Im Bus hani du o miteme Ma vo Mendoza gredt, wo mir sini halbi Läbensgschicht u mindeschtens 3/4 vo Mendoza erklärt het! 🙂 Na ja… vil bracht hets äuä nid. 😉 Das relativ spät gsi isch u i mir vo Santiago us kes Hostel ha chönne reserviere, hani mi im Busterminal mau chli umegluegt tatsächlich ä Agentur gfunde, wo mir het chönne witerhälfe. Si het zimli vil Telefon gmacht, het aber du doch no äs Zimmer imene Dormitorio für mi gfunde. Het mi 30 Pesos une Nacht Schlaf koschtet! 🙂 Tja… isch chli sehr lärmig u mega heiss gsi! Am Morge bini du ufd suechi nachemene andere Hostel. Ha gli eis gha, woni für 25 Pesos ha übercho im Dormitorio. Allerdings isch hie alles vil ruhiger u suberer! 🙂 Derna hani mir der erscht Tag da in Mendoza Argentinie chli umd Ohre gschlage. 🙂 Das heisst i ha alli mini Toure buechet u mau das sogenannt sagehafte Fleisch wo si hie hei versuecht! 🙂 Das isch würklech sehr sehr guet! U nid nur das Glische stimmt! 🙂 O das vo de super schöne Froue! Die hets da effektiv meh als a andere Orte! 🙂 I der Nacht bini du scho grad chli umd Hüser zoge. Ds Nachtläbe hie fat mega spät a u drum ischs du zu mim erchlüpfe o scho grad wider Morge am 6i worde. 😉 Das isch du o der Grund derfür gsi, das i mis ds Morge woni ds guet gha hät, verpasst ha! Na ja… derfür isches nachem Usschlafe scho gli ufene Tour zu de Wygüeter! Und siehe da… öppis meh wo stimmt. Der Wy hie isch ä Traum!! Für mi no schöner als d’Froue! 🙂 Oder äch… 🙂 Jedefalls isch Tour super guet gsi. Am Abe hani de im Hostel der Federico us Buenos Aires kenne glehrt. Mir si du o grad zäme ga ichoufe u hei zäme kochet! Fleisch, wie chönnts hie anders si u i ha no chli Salat gmacht, wo ihm offebar sehr guet gmundet het! 🙂 (french dressing!) Derna isch är scho gli ga lige, da är no müed isch gsi vo der Areis! I bi wider umd Hüser zoge u ha du ire Bar zwöi Däninne vo üsem Hostel troffe. Mit dene hani du no äs Glesli zwöi gno, bevor mir relativ früe is Bett si. Das heisst hie so ca. 3 am Morge! 🙂 Am nächschte Tag hani nur grad ä City Tour gha am Nami, wo aber nid so der super knüller gsi isch! Allerdings gfallt mir d’Stadt super guet! Die hei hie mega vil Pärk u alles isch rächt grüen bepflanzt mit vil Bäum u Allee! Es isch ä Art Oase i dere süsch so trischte Umgäbig, wo eher äre Steppe glicht! Am Abe bini wider mitem Federico underwägs gsi. Mir si ga Ässe, was super guet gsi isch u derna no ine Disco. Dert isch allerdings nid so speziell gsi. Na ja… immerhin hets vil Lüt gha u churz bevor mir gange si, hets no ä Stripdease Show gä! 2 Froue u ei Ma! Also für alli öppis! 🙂 Äs hiesigs Meitli hät mi du o gärn no chli lenger dert bhalte, aber i ha wöuä ga, da i früe use ha müesse. Es isch ja eh o scho wider 3 am Morge gsi! 🙂 Am Morge früe isch es use gange für ga ds Riverrafte! 🙂 Mega spassig gsi! Da hani no der Andreas us Dütschland kenne glehrt, wo zur zyt grad in Buenos Aires schaffet. Bi ihm finde i de eventuell underschlupf weni uf Buenos Aires ga. Am Abe bini du rächt kabutt gsi vo däm doch länge Tag u bi nachdäm i mir ds Nacht gmacht ha scho gli ga lige. Am Morge früe bini du uf die nächschti Tour richtg Bärge, bzw. Chilenischi Gränze. Da ds Wätter nid so der Hammer isch gsi, hei mir leider nid so ä super Usblick ufe Höchscht Bärg in Amerika gha. 🙁 Na ja… Es si zwar 6900 u öppis Meter, aber es schint alles irgendwie nid höcher ds si als bi üs, da Distanze hie so risig si! Wie o immer… mir si meh oder weniger der ganz Tag im Bus gsässe u hei grad mau 2-3 schöni örtli chli chönne ga aluege. Ischs nid so der Wärt gsi die Tour. Bi du am 8i im Hostel gsi, schnäu ga tüschele u derna scho ufe Bus nach Bariloche! Me wider vo da. Fotos gits so gli wie mögli.

¡Hasta la proxima!

Santiago und Chile zum 2. und letzten!

January 11th, 2007

Tja…. so schnaeu cha das Abentuer ds Chile ds aend ga! 🙁 Snif! Aber leider het das mit de Osterinsle nid so klappet, wie i das gaern gha haet. I der Naebesaison chasch fuer paar hundert Dollar ga u itz haets mi alles i allem mindesschtens 1500 Dollar koschtet. Was sicher minimum ds 3-fache isch! U das isch mir das Abemtuer nid waert fuer grad mau 4 Naecht! De wirdeni itz aebe scho Morn uf Argentinie nach Mendoza reise. So chani de eventuell chli meh Sache undernaeh dert! 🙂 Soeu ja schins o schoener si dert! So itz aber no zu daem wo hie no passiert isch…. I bi am Maentig no d’Stadt genauer ga aluege. Das heisst, i ha vili schoeni Paerk gseh, 2 verschideni Maerkt bsuecht, ae Ussichtpunkt bestige (mitem Baehnli :-)), wo uebrigens sehr sehr schoen gsi isch, usw.. Am Abe hets du im Hostel Spaghetti-Plousch gae! Das isch sehr gmuetlich u schoen gsi. Allerdings isch mir duer das das es spaet worde isch u vil Wy im Spil gsi isch, ds Ufstah nid grad ringer gange am Tag druf! 🙂 Aber i bi glich uf u ha mi nach Vina del Mar, bzw. Vallparaiso begae. Die Stedtli am Meer si so schoen u o so verschide, obschon si inenand verschmilze! Einersits isch Vina mitem Strand, de Touris, de tuerschte Wonige (nur vo riche ds zahle, rich i uesem Sinn!), usw. und anderersits isch da Vallparaiso als Hafestadt wo sehr busy, kriminell, lut, draeckig, usw. isch. Dert goe d’Hueser a Huegel ufe u si bunt bemalt, was daem eher schlaechte Ort o sehr vil Charme verleit! Das alles hani imene Tag mitere Tour gmacht, woni vor Ort i letschter minute bi derzue gschloffe u drum o fasch nuet derfuer zahlt ha! 🙂 Isch aber super schoen gsi u het ae CD mit Fotos als adaenke gae! Huet hani du versuecht der Flug oder Trip ufd Osterinsle ds uebercho u bi i verschiedeni Agenture grennt, wo mir alli ke befridegendi Loesig hei choenne biete. So gani itz also nachemene letschte sicher schoene Abe da morn witer nach Mendoza Argentinie!

Hasta luego Chile!

Santiago (erste Eindruecke)

January 8th, 2007

I bi hie am abe churz vor de 8i acho. Da i vomene Franzos wo mit uf der Tour duers Valle Elqui isch gsi ha ghoert, das da ds Backpacker Hostel Sammy guet sig, bini grad mitem Taxi da haere! Und siehe da… es isch absolut der Hammer hie!! Es isch 5000 Pesos, was ca. 12 Franke si, het aber aes super guets ds Morge derbi u gratis Internet, wo mega schnaeu isch! Isch auso so schnaeu wie dehei! 🙂 Aber leider faehle mir d’ae!! 🙁 U hie hets mega vil cooli Luet! Drum bini am Abe o grad i Usgang! 🙂 U wueu mir ues so genial verstande hei, isch es o nur bis am Morge am 6i gange! 😉 Das isch itz o der Grund fuer mi Relaxtag, woni ilege! 🙂 Allerdings mues i eh mi no chli organisiere huet, damit i de ab Morn alles hie i der Umgaebig cha ga aluege! Was i bis dato vo der Stadt gseh ha, gfallt mir raecht guet. Me fuehlt sech hie in Chile doch raecht vil sicherer als suesch so. Hie im Hostel hets itz alles…. Kuchi, Spilzimmer mit Billiard, Toeggele, Playstation, ae Musigruum, aes TV-Zimmer mit ueber 900 DVD’s, Woeschmaschine, usw.. GENIAL!! 🙂

Ha euch no News! Underem Album vo La Paz findet dir neu o aes Subalbum mit de Bilder vo der Todesstrecki!

Vo hie us wirdeni itz mi Reis o no nach Patagonie witerfuere, was i ja zersch nid ha woeuae! Derfuer gsehni weniger vom Norde vo Argentinie, als i zersch daenkt ha. Fuere Carneval, hani mi itz o entschide. Dae wirdeni in Salvador verbringe und nid in Rio! Witers de immer wider i de Brichte!

Bis bald dir Liebe!

Haerzlechi Gruess

Ralph

La Sarena, Valle Elqui

January 8th, 2007

Nachere lengere Fahrt uf La Sarena, bini trotz allem sehr entspannt da acho, das wie gseit der absolut bescht Bus gsi isch, woni bis itz gfahre bi! I ha du i der Noechi vom Busbahnhof u Zentrum aes billigs Hostel gfunde. Das isch nid so der Hammer gsi, aber immerhin hets naetti Luet gha, wo mir gaern gholfe hei, weni mau ae frag gha ha. 🙂 Was oeppe no vor chunnt! 😉 U de Buebe vo der Senora, hani du o no grad aes paar spili zeigt, wo si mit irne wenige spilsache hei choenne mache. Die hei mega freud gha a mir u hei mi chum woeuae usela bevor i nid chli mit ine gspilt ha! 🙂 I bi am gliche Tag no die ganzi Stadt ga erkunde u ha mini Toure fuere naechscht Tag buechet! Ja… Toure! 🙂 Ha naemli 2 am gliche Tag gmacht. Uebere Mittag hani mi imene japanische Garte, wo wunderschoen gsi isch, chli erholt. Derna hani i der Stadt ae gueti Tat woeuae verrichte, i daem i eire wo isch cho baettle fuer sich u ires ungeborene, ha ds aesse kouft. Die Frou het vermuetlich psycheschi Problem da si die ganze Aerm verschnitte gha het. Allerdings isch das nid so sicher, denn nach daem das i ire u irere Schwoeschter ds aesse kouft ha fuer die ganzi Familie, hei die mi doch tatsaechlich no mitemene Ritual, wo mir Glueck, usw. soeu bringe, woeuae usnaeh! Choennt also alles nur fuerd Choele si! Das isch der Dank gsi fuer mini Grosszuegigkeit! 🙁 Bi mir raecht extrem verarscht vor cho! Aber zum glueck hanis ja gmerkt, so hei si eifach nur ds Aesse vo mir gha u nid meh! I ha se du o raecht zaemegschisse fuer dae Scheisss! Aber aebe…. das geit aeuae glich no so witer bis zum Naechschte! Derfuer bini derna ganz speziell zuvorkommend behandlet worde im Restaurant, wo i bi ga aesse! Ds Menu fuer ca. 2.80, wo sehr guet gsi isch, mitere usserordentlich sypatische Serviertochter, wo mir als einzigem Gast (alli andere hei a Kasse muesse) d’Raechnig a Tisch bracht het! 🙂 Wini das wider eis verdient ha…??? Na ja…. het mi oemu grad mega ufgstellt nach daem sch… Erlaebnis vorhaer! 🙂 Am Abe bini du relativ frue ga lige, nachdaem i mir im Stedtli no aes externs Ladegraet fuers Natel kouft ha, da das sch… Telefon eifach immer schlechter tuet! Am Morge isch es du zimli puenktlich (ussergwoehnlich fuer Suedamerika) uf Tour is Valle Elqui, wo mir 2 Piscofabrike (ae neui moderni une traditionelli) si ga aluege (natuerli mit Degustation), Trube vom Wibau (mi Lideschaft 🙂 ) hei choenne probiere, aes guets Mittagaesse hei doerfe gniesse, ae Stausee wo si druf soerfe gseh hei u no paar Sache meh! Am halbi 7ni si mir zrugg cho u i ha mi churz uf Ohr gleit, bevor mir am 9ni (bzw. fasch 10ni) uf Tour zumene Observatorium gstartet si! Hie i der Umgaebig hets sehr vil vo dene Statione, denn da isch der Himmel speziell klar und ds Streuliecht isch sehr gering! Es stoeh i unmittelbarer Umgaebig drue vo de groeschte Observatorium uf dere Waelt! Das wo mir si gsi, isch aes chlises, speziell fuer Tourischte igrichtets gsi. Aber d’Fuerig isch guet gsi u i ha mau o no die Staernbilder choenne gseh, wome vo uesere helfti us nid cha bestuune! U da i mi wider eis als Dolmetscher fuer diversi Luet ha choenne nuetzlich mache, hani mit etliche gueti Gspraech gha dert u uf der Rueckfahrt! Guet am Morge am 2, isch es du is Bett. Am Morge hani usgschlafe u bi de nacheme Mittagaesse im gliche Restaurant wo scho mau, am 1 ufe Bus nach Santiago. Meh de wider vo da.

LG a alli

Hola Chile, San Pedro de Atacame!

January 4th, 2007

Der Bus uf San Pedro abe isch für mi ä richtige Ufsteller gsi! 🙂 Nid das i nid gärn no chli ds Bolivie gsi wär, aber i bi mir doch richtig guet vorcho, wo dä Bus nach paar Kilometer ufene tereti Strass boge isch! 😉 Der Chauffeur het üs du o grad super mit allem vertraut gmacht u üs über alles was so passiere wird u cha in San Pedro beschtens informiert! So si mir du nach der Passkontrolle mitte im 4000 Seele Dorf glandet. Prise da si mit Abstand die extremschte, woni uf dere Reis bis Dato atroffe ha! Het mi also fasch umghaue, das doch usser am Übernachte, fasch glich tür isch gsi wie bi üs!! U das isch für Südamerika doch gar nid normal! Na ja…. itz isch scho wider besser… es isch halt äuä wüus gar nüt anders het dert! Isch ja meh oder weniger mitte i der Wüeschti u der einzig Ort a dere Gränze. Jedefalls hani gli äs Hotel gha u das für ca. 10 Dollar. Allerdings der chlinscht Egge wos het chönne si u mit Duschi u Bad teile u ds angäblich warme Wasser, hani vergäbe gsuecht! Aber da mir da scho dütlich tiefer si gsi, mit knapp 2400m isch es scho rächt warm (25 Grad) gsi u drum nid so schlimm, das ke warm Wasser gha het. 🙂 Im Hotel hani du o grad 2 Schwizerinne troffe (Claudia und Petra). Mit ine bini du später o ga ässe u ha si um Mitternacht no zum Hotel begleitet. Derna bi i no chli uf der Strass gsi ga Silvestere. Hie tüe si zum Silvester so ä Art Böög verbrönne! Gseht no nachemene schöne Bruch us! U de hets no ä Gruppe uf der Strass gha wo mit brönnende Keule schongliert u mit brönnende Kette (ändi) “tanzet” het. Mues säge, het rächt idrücklich usgseh! Derna isch für mi Zyt vom relaxe cho! 🙂 I bi a de Täg druf nur im Dörfli umeghanget u has mir chli la guet ga! 😉 Ha das grad eis chli brucht als Uszyt vom Reise u usserdäm hets i der nöchi nüt speziells me gha, woni nid scho ire ähliche Form mau gseh hät. Bi hie im Dorf o wider uf Lüt troffe, woni underwägs scho meh gseh ha! Under anderem o are Gruppe vo Ängländer wo miteme umbaute Lastwage underwägs isch. Dene schliesse i mi de eventuell ab Santiago us a, da si meh oder weniger der glich Wäg mache wo i gärn wett. Chunnt alles no uf ire Chef in Ängland a… der Pris sött drum de scho stimme! 🙂 Jedefalls het mir ds Dörfli als solches sehr guet gfalle. Geschter hani du der bescht Bus vo mim Läbe (der türscht o! :-)) gno u bi i der Nacht hie nach La Serena gfahre. Me de wider vo da.

¡Hasta la proxima!

Salar de Uyuni

January 2nd, 2007

D’Reis uf Uyuni isch no mau vil vil schlimmer gsi als die nach Potosi! 🙁 Guet 7 Stund im Bus uf Schotterstrass, das isch verdammt vil, sälbscht bi nätter Begleitig! Ufff!! Aber mir heis o überstande u si total kabutt in Uyuni uf Hotelsuechi. Das hie scho über äs Jahr lang nüm grägnet het, hei si fasch alli ke Wasser wöuä ha. Mir hei du äs Hotel gfunde, wo am Morge het Wasser wöuä chönne mache u hei üs für das entschide. Mir si no chli id Stadt, hei öppis chlises gässe, i ha paar Sache müesse ga choufe, när hei mir no is Internet wöuä… aber wie chönnts o anders si…. Stromusfall i der ganze Stadt! 🙂 Das Bolivie isch der Hammer! 🙂 Na ja… mir si du ga lige u hei dank mine Cherzli woni immer derbi ha o no chli Liecht gha zum UNO spile. Mitte i der Nacht hets du uf einisch ä mega Lärm gä. D’Mariana isch uf ga luege u het grad agfange hüpere… i ha kes Wort me verstande, da si so zitteret u gschlotteret het. U wo i du as Fänschter bi cho, hani nüt me gseh! Irgendwenn hani se du chönne beruhige u si het mir chönne erkläre was passiert isch. Es sige schints Lüt dusse gsi, wo ä Frou zwunge heige äs Zimmer uf ds tue u da het si Angst gha, das de die i alli Zimmer chöme! Üs usraube oder schlimmeres! Na ja… leider het si mir nid chönne säge wo die häre si, ob si Waffe hei gha oder was o immer… si hets nid gseh. U da när gli wider ruhiger gsi isch, hani o nid grad i alli Zimmer wöuä ga frage. I hoffe itz es sig nüt schlimmer passiert u es sig krach under de Iheimische gsi, was i vermuete. Denn der Ma vom Hotel isch churz druf düre u dä het völlig ruhig gwürkt. Wie o immer… i ha d’Mariana nach einiger Zyt o chönne beruhige u si het du wider chönne pfuse! Am Morge si mir du nachemene guete ds Morge uf üsi Tour i Salar gstartet. Mir si als erschts äs Dörfli ga bsueche wo grad am See anne isch u vor Salzproduktion läbt. Dert hei mir gseh wie das alles vor sich geit. Isch no interessant, wie die das mache u vorallem wie wenig so Salz wärt het! Derna si mir äs us Salz konstruierts Hotel ga aluege, bevor mir witer uf der Insel Pescado (Fisch) üses ds Mittag becho hei! 🙂 Isch guet gsi u het für üs sogar äs Bierli derzue gä, da mir nid so Cola Fans si! 😉 Ha mi du o fasch chli verbrönnt i der Salzwüeschti. Witer isch es du wider usem Salzsee use über d Hochäbeni. Hie isch alles karg u öd u vorallem unändlich wit! 🙂 Die Distanze da si GIGANTISCH! Am Nami hei mir no ä Lagune gseh. Derna si mir bi dere i der nöchi i üses Hostal. Dert hei mir wider sehr guet ds Nacht gässe u derna no chli UNO gspilt mit de 2 Froue us Holland (gebürtegi Französin u Kroatin). Üse Guide der Carlos u si Gehilfe der Abel hei nid nur Tour gmacht u alles erklärt, sondern o no kochet u o süsch alles für üs gmacht. Am morge früe ischs de wider uf Piste. Da hei mir ä Vulkan, wo no aktiv isch, gseh u uf sine Usbrüch vo früecher chönne umeloufe. Derna hei mir irgendwo mitte i der Pampa ds Mittag übercho. Da het mi de die gueti Musig wo si immer gspilt hei im  Auto o nümme gha u i ha chli ums Auto muesse tanze! 🙂 Witer si mir du ä Ort mit altem Lawagstei ga bsueche, wo hüt vil Chüngeli söuä läbe (kes gseh, Snif!) u derna zum Steibaum, wo tatsächlich so usgseht! 😉 Witer zu witere Lagunene, wo mir wider i der nöchi übernachtet hei. Dert hei mir du gfeschtet bis am Morge früe, obschons het gheisse das mir am halbi 5i use müesse! 🙂 Aber mir heis ir Gruppe vo 6 Lüt so guet gha… Es isch du sogar so wit cho, das Guides mit üs gfeschtet u trunke hei, was für si ds erscht mau sig gsi! Fasch nid ds gloube, denn der Carlos macht das immerhin scho 3 Jahr! Aber äbe… Mir heis geil gha a üsem letschte Abe in Bolivie! 😉 Am Morge hani du alli chli müsse motiviere füre Arsch ds lüpfe, aber mir si ömu gange! 🙂 U nachem Bsuech vo de Geisire si mir ire Heisse Quelle uf guet 5100m ga bade! Kaum zu glauben, aber voll geil gsi! 🙂 Nach dere schöne Erfahrig, wo nur grad i u der eint vo dene beide Japaner wo derbi gsi si, gmacht hei, hets ds Morge gä. Het das guet ta!! 🙂 Nach der letschte Lagune (Verde) si mir du ad Gränze bracht worde, wo 4 vo üs hei Abschied gno. Underanderem o i vo der Mariana. Aber i wirde si vermuetlich in Sao Paulo wider träffe. Bi ömu härzlech iglade! Tja u de isch es du mitem Bus nach Chile! Me de vo da!

¡Hasta luegeo Bolivia!

Potosi

January 1st, 2007

D’Reis uf Potosi isch meh ä Tortur gsi als ä Reis! Zum Glück hani mit der Mariana ä gäbegi Begleitig gha, so si die 3,5 Stund uf Schotterstrass nid sooo läng vorcho! 🙂 Aber mir si ömu beidi rächt müed gsi, wo mir dert gsi si. Dsersch si mir du nachem Hotelbezug o grad id Stadt gange, da mir am Nami ä Tour hei wöuä mache id Minene wos da het. Das hei mir du o chönne bueche. Nachemene churze super guete Mittagässe, si mir du i das Abentür gstartet. Abentür isch das scho chli, weme die Bedingige da het agluegt. Bi üs wär schaffe so unvorstellbar u ersch rächt der Bsuech under dene Sicherheitsvorstellige hie…. aber äbe… Bolivia! 🙂 Uf jedefall isch es sehr idrücklich gsi i dene Minene umedschrable u die Arbeiter bi der Arbeit ds beobachte. Es het sogar äs chlises Museum gha i dene Mine! Allerdings halb zerstört vo de Sprängige! 🙂 Am Abe si mir no mau gmüetlich ga ässe u derna nachemene Glas Wy früe u guet ga schlafe. Am zäni am Morge si mir du o scho witer nach Uyuni! Fotos chöme so gli wie mögli.

LG Ralph

Sucre

December 29th, 2006

Das doch no klappet het mitem Flug, bini sehr guet in Sucre acho. Nach der fahrt mitem Taxi is vom Fabian reservierte Hotel, hani de die beide o scho grad im aligende Internet troffe! Schön gsi wider eis vertrauti Gsichter ds gseh! 🙂 So hani mi du o scho ufd Wienachte chönne freue, o wenns ganz anders isch gsi als dehei! Am Abe bini mitem Fabian ga ässe. Da d’Lili nid so guet zwäg gsi isch, isch si dehei blibe. Ds Restaurant isch wie alli wo mir no bsuecht hei, sehr guet gsi. I der Stadt het me fasch alles ds Fuess chönne mache, da alles so nöch isch gsi. Am Tag druf bini d’Stadt chli uf eigeti Fust ga besichtige. Am Nami bini mit ine zwöi ine gueti Beiz, wo mir du bis am Abe spät gsässe si, gspilt u gässe hei. Isch mega luschtig gsi! Nid grad Wienachtsmässig, aber sehr schön! 🙂 Leider isch dä Tag der Lili nid guet becho, so das i der 25. mitem Fabian wider alei verbracht ha…. oder ömu fasch! 🙂 Denn wo mir am Abe si ga ässe, isch dert d’Mariana us Sao Paulo ganz alei am Tischli ghöcklet. Drum hani se du iglade zu üs… denn so Wienachte ohni öpper, isch doch nid so der Hammer! Mir hei üs so guet underhalte, das si am nächschte Tag mit üs drü isch mitcho cho ässe am Abe. Mir drü (d’Lili isch wider chli besser zwäg gsi) si am Nami no die Dinosaurierspure ga aluege, wo si da i der Nöchi gfunde hei. Us dere Atraktion isch du o ä Park worde, wo Läbensgrossi Dinos usgstellt gha het! Schön gmacht gsi, mues i säge! Fasch chli verruckt für hiesegi Verhältnis! Da d’Lilian u der Fabian no nid us der Stadt hei wöuä, het sechs du so ergä, das d’Mariana u i iri Tour füre Salar de Uyuni überno hei. Drum si mir zwöi am Morge früe witer nach Potosi. Sehr schad gsi, das es dene beide no nid so guet gsi isch, das si mit üs hei chönne witerreise! Wär sicher mega guet worde! Aber äbe… Hauptsach es geit ne gli wider besser! U nach dere Reis hüt uf Uyuni, mues i säge, isch es sicher besser gsi, hei si sech no gschonet. Meh aber de imene andere Bricht. Sucre isch übrigens für mi eini vo de schönschte, wenn nid die schönschti Stadt bis itz!

Wünsche a dere Stell allne ä guete Rutsch unes glücklichs neus Jahr! Hoffe dir chöit das vorallem bi super gueter Gsundheit gniesse!

LG

Ralph

La Paz, Todesstrecke, Tihuanaco,…

December 24th, 2006

Das isch itz mau wider chli meh Action gsi! 🙂 Bini doch am Abe spät in La Paz acho und mitte i der schlimmschte Gägend usgsetzt worde! Da isch mir du nid grad so wohl gsi, mit all däm Gepäck am Rügge usw.. Aber i ha zum Glück ä nätte Taxifahrer verwütscht. Är het mir du o grad sofort erklärt, das i mi da nid sött ufhalte, het alli Türene gschlosse u mi is Zentrum zumene Hotel gfahre u das ersch no zum voll faire Pris vo 8 Bolivianos (ca. 1.30). Uff! 😉 Am Tag druf hani mir du ä gmüetleche Tag i der City gmacht. Ha mis Tagebuech uf vorderma bracht u mini Toure für die nächschte Täg buechet. Drum bini du am Tag druf scho uf die sogenannti Todesstrecki mitem Mountainbike. So knapp 4000m Downhill! 🙂 Isch voll der Hammer gsi u wie immer isches mir Adrenalinjunkie ds langsam gange! 🙂 Hani doch der Guide immer wider chli zu höchschtleischtige tribe! 😉 Allerdings isch die Strecki em Name fasch gerächt worde, denn ä Dütsche us üsere Gruppe isch am Gigampfe gsi überem Abgrund! U dert geits zum Teil eifach x-hundert meter grad abe! Schwein gehabt!! Underwägs chunnt me de o a sehr vilne Gedänkplätz verbi! Was i so ghört ha, u das dörft lang nid alles gsi si, müesse dert i de letschte 20 Jahr mindeschtens 300 Mönsche tödlich verunglückt si! Aber…. ein bisschen Spass muss sein! 🙂 Underwägs uf däm megatripp hets immer wider Snacks gä u dunne hei mir ines Hotel chönne ga Tusche u bedele im Pool, bevors äs Buffet gä het! Super genialä Trip! Zum empfähle! Am Abe hani du no versuecht mis Busbillet ds übercho für i der Nacht druf nach Sucre ds fahre. Leider isch us 3 Stund u jedere Busgsellschaft befrage, kes Ticket worde, da alli usverchouft gsi si! 🙁 Mega der Stress! I bi du a Flughafe, cha sech der Europäer ja leischte hie u hät gärn dert äs Ticket gha für 23.! Na ja…. immerhin hani uf der Wartelischte als Nummer 1 ä Platz übercho! 🙂 Zum Glück het du das o klappet…. bi mega skeptisch gsi ob de da öppis frei wird. Aber es het klappet. Aber no zum 22.. Da hani no ä Tour nach Tihuanaco gmacht. Das si die bekanntischte u gröschte Ruine hie in Bolivie u die si vor der Zyt vo allne andere gsi… schints! 🙂 Aber weni das alles so gseh ha, hani da doch so mini zwifel! Aber es isch ja eh nüt so hundertprotzent sicher um die Kulturene da! 😉 Aber der Usflug ansich isch guet gsi. Leider bini mega ufem Hund gsi vom Vortag, da dä doch vil länger gange isch als erwartet. Aber nüt desto trotz, bini am Abe no ine Folkloredisco, oder so… 🙂 Uf jedefall hets dert vil Iheimeschi Musig u tänz gä! 🙂 Isch aber ä sehr guete u schöne Abe gsi. Ha sogar glehrt tanze uf Bolivianisch, da i fürne Iheimische ghalte worde bi! 🙂 U der Hammer isch ja gsi, das sech mir eini het a Hals gworfe (wort wörtlich) u mir ä paar Minute später der Ma vorstellt! 🙂 Zum Glück isch Morge am 2i gsi u d’Musig het grad ä Pause gmacht, so das i mi grad ha chönne dervo stähle! 🙂 Hüt bini du jedefalls no guet greist mitem Flugi nach Sucre u ha hie o mini Fründe wider troffe. Itz freue i mi ufenes speziells Wienachte! 🙂

Wünsche allne äs schöns Fescht! Bis bald.

Liebi Grüess id Schwyz

Ralph

Titicacasee!

December 20th, 2006

O hie hani wie a de meischte Orte ä super zyt verbracht! Was hie speziell gsi isch, isch ds Gfühl, das hie zyt stah blibe isch! So wie die Mönsche da Läbe… irgendwie het das ä ganz spezielle Idruck hinderla. Acho mitem Nachtbus hani du amene verschüpfte französische Meitli, wo scho bir Abfahrt müe gha het, mi Hilf abote. 🙂 D’Veronigue (schins Model!) isch du ganz froh gsi u gärn mit mir mitcho. Mir hei üs de o grad la informiere über Tours wo möglich si u hei du o grad buechet. So si mir am gliche Tag vo Puno us mitem Schiff witer uf die Schwümmende Insle u när no ufene grösseri feschti. Dert hei mir du bire Iheimische Familie chönne übernachte. Die hei hie no gar nüt, ke Strom, ke warm Wasser, kes Leitigssystem, usw.. Eifach nüt! Wie we zyt stah blibe wär u sämtleche Vortschritt nie stattgfunde hät! Si loufe o alli i de tradizionelle Trachte ume u verhürate sech nur under de Inselbewohner, usw.. Ganz äs speziells Volk! Aber sehr idrücklich gsi das alles so nöch chönne ds erläbe! Uf dere Insle hets o no Tämpelalage vo de Inkas, wo mir si ga aluege. Am Tag druf si mir witer ufene witeri Insle i der Nöchi. Die isch aber du scho vil Touristischer, obschon chliner. Dert hei si de alles gha. Strom, Wasser, Restaurants, Hostels, usw.. När si mir zrugg nach Puno, wo i übernachtet ha. D’Veronique het der Nachtbus nach Arequipa gno, da si füre Morge Demos agseit hei, wo si d’Strasse hei wöuä sperre. Das isch du o besser gsi so, denn das hei si würklech gmacht. 🙂 Dür das het du mi Bus nach Copacabana in Bolivien (am Titicacasee) o vil vil müe gha u isch nur mit umwäge (zum Teil über offeni Fälder) u vil verspätig dert acho. A der Gränze hei si mir du no wöuä Falschgäld atreie, woni zum glück ha chönne umga. 🙂 In Copacabana (ä mega härzige chline Ort) bini du grad ufene Tour uf d’Isla del Sol. Das isch allerdings nid so für vil gsi, da mir dert nur ä Stund zyt gha hei! Aber die Insle gseh glich us wie die woni in Peru gseh ha, dahär nid so schlimm gsi. När bini woni zrugg cho bi grad ufe Bus nach La Paz, woni zur zyt bi. Hät gärn no chli meh zyt in Copacabana verbracht, schint ä sypatische Ort ds si. Bald de meh vo hie us Bolivie!

¡Hasta la proxima!

Machu Piccu!

December 20th, 2006

¡Hola Amigos!

Das isch effektiv eis vo dene Erläbnis, wome gmacht ha mues, weme da äne isch! 🙂 Obschon das es am Morge woni ufe bi grägnet het was es nur het chönne, so isch dä Idruck vo dere Tämpelstadt i de Bärge der absolut Hammer!! Aber vo vore… I bi am Tag vorem Ufstieg am Morge am 6i ufe Zug nach Aguas Calientes. Im Zug hani der Richard us Amerika troffe. Mit ihm hani mi der ganz Wäg düre underhalte. U was mega luschtig gsi isch, mir hei doch ufem Rückwäg der Tag druf tatsächlich nomal der glich Sitzplatz gha! U wider hei mir die ganz zyt plöiderlet! 🙂 Är isch so um di 50gi u Psycholog. In Aguas Calientes hanis mir de gmüetlech gmacht u nüm würklech öppis undernoh! Ab und an chli abschalte tuet ja o ganz guet! 😉 Am Morge am 6i si mir du ufe Machu Piccu ufe! Leider hets us Chüble gosse, so das mir fasch nid vom Fläck cho si mit der Gruppe. U dürnässt bini o gsi, trotz Rägeschutz u Schirm!!! Aber dä Ort het ä so ä rise Chraft une ungloublechi Ustrahlig, das eim das alles vergässe lat! Me cha das nid guet i Wort fasse, was eim dä Ort git u was me da fürne Chraft u Rue füelt. Eis isch eifach so, das me a däm Ort tage chönnt verbringe ume sech ire Sicherheit ure Energie widerfindt, wome vorhär nie würd für möglich halte! Allerdings mues me sech o druf ila wöuä! Jedefalls hani weni a dene Monolite bi verbi cho oft der drang verspürt die immense gigantische Steine adslänge u derbi hani ä Chraft gspürt, woni nid cha i Wort fasse! Vilich isch o das der Grund gsi, würum i d’Energie gha ha, uf fasch alli Höger rund ume ufedschrable u alles ga adsluege, ohni das i am Abe wär müed gsi!! Jedefalls het dä Ort für mi öppis magisches widergä!! Am Abe bini mitem Zug und em Richard retour. Im Zug hani no d’Ana us Rio de Janeiro kenne glehrt! So luschtig gsi… ha mit em Richard diskutiert, das i no Infos übere Carneval mües ha u das i das sicher wöu mache, aber no nid wüss wo genau. Denn triffe i si u ha alles!! 🙂 So geil! Derna bini mitem Richard u de Schwizer (Andi u Noemi), wo underdesse o in Cuzco acho si, eis ga trinke. Si hei du o no ä Huufe anderi Lüt mitgno, underanderem o die beide Dütsche womer us Huaraz kenne. Leider hani fasch ke zyt gha, da i ufe Nachtbus ha müesse nach Puno a Titicacasee! Aber isch schön gsi alli ds gseh! Bis bald ihr Lieben!

LG a alli

Cuzco!

December 15th, 2006

Am Morge früe mitem Flugi acho, nach grad mau 35 min Flug (astell vo 10 Stund Bus), bini mit Agebot überhüft worde. Da i aber öppis brucht ha, hani mau der erscht beschte mis Ohr gschänkt. 🙂 Das het sech als nid schlächt erwise. I ha mit ire grad mis ganze Programm hie abgmacht u buechet. Si het mi o is Hotel bracht u luegt itz die nächschte täg chli zu mir. 🙂 Somit bini hüt nachere churze zyt im Bett chli id Stadt. Derna hets am Nami ä gfüerti Tour dür d’Stadt, bzw. id Umgäbig gä. Da si mir Ruinene, Chilene,… ga aluege. Isch ä gueti Tour gsi! Obschon i doch mitlerwile fasch alles scho kenne, wo si über die Inka verzelle! 🙂 Has afe soooo mängisch ghört, das i das scho bau sälber cha widergä! 😉 Nach der Tour bini ga ässe. Ha äs guets Beizli gfunde wo ds Menu für 4 Soles gha het. Wider mau mit allem…. Suppe, Ris mit Zunge vomene unbekannte Tier 🙂 (guet gsi) und äs Dessert, sowie Mate Tee. Am spätere Abe bini du no chli is Internet, wo wider mau voll sch… gsi isch! 🙁 Aber das gits halt hie immer wider! Git aber doch o rächt vil gueti. U derna no ab ine Disco! 🙂 Bi aber zitig wider hei (1), da i doch rächt müed gsi bi. Ha dert ä österricher (Christoph) troffe, wo mi du am nächschte Tag o uf üsere Tour begleitet het. Die Tour isch am halbi 9i los u am halbi 7ni am Abe zrugg gsi. Mir hei 3 verschideni typeschi Märkt bsuecht, ä Chile agluegt u 2 Tämpelalage (super guet!!) besichtiget! Geniali Tour gsi mit Buffet zum Mittagässe vo allem mögliche Ässe da us der Gägend. Under anderem hets o Alpaca (ä Art Lama) gä! Isch super fein gsi u het mir du grad o gnue gä füre ganz Tag! 🙂 Woni bi zrugg cho, hani no grad mitem Jules abgmacht für id Disco. Är isch ä Schwyzer us Sierre, wo i am Vortag im Hotel troffe ha. Är het allerdings spaneschi Eltere. U da är französisch red, hei mir üs uf spanisch underhalte! 🙂 Bevor mir aber i Disco si, bini no ä Folklore Verastaltig ga aluege. Dert hei si Musig u Tänz us der Region gspilt, bzw. ufgfüert. Absolut traumhaft gsi! I der Disco hei mir du, wie immer hie jede Menge Lüt kenne glehrt. Under anderem hani o mitere Peruanerin gredt, wo in Zug läbt u hie grad Ferie macht. Der Hammer… si het mir nid wöuä gloube das i Schwyzer sig!! I sig bestimmt Peruaner oder mindeschtens vo Südamerika u wöu nur nid derzue stah! 🙂 Na ja… söu si gloube was si wott! Oder Mami? 😉 I bi aber o a däm Abe wider früe gange, obschon is mit Jules super guet gha ha! Aber bi ja hüt Morge früe witer nach Aguas Calientes. Meh de später vo da u vom Machu Piccu.

¡Hasta luego!

Arequipa!

December 14th, 2006

D’Reis da häre isch super guet verloffe. Ha ä super Bus mit geniale Sitze verwütscht u ha obschons zwe gha het wo gschnarchlet hei wie Wahlrösser chönne pfuuse! 😉 Im Busbahnhof isch mir du äs guets Hostal empfohle worde. Die si mi cho abhole, bzw. hei äs taxi gschickt u zahlt u d’Übernachtig het nur grad 20 Soles koschtet im Zimmer mit Bad. Die Froue usem Hostel si sehr familiär gsi u hei guet zu mir gluegt. Ha vil Tips übercho u guet chönne bruche. Ha du am gliche Tag no, nachdäm i mi glich no chli Usgruet ha, am Hector aglütet. Das isch der Ma gsi woni in Sipan kenne glehrt ha, woni ihn u sini Schwöschter mit id Stadt gno ha. Är het du grad zyt gha, da är unregelmässig schaffet als Dokter, u isch mi cho abhole ir Stadt mit sim Auto. Derna het är mi a diversi Orte i der Stadt u der Nöchi gfüert. Är schint nid nur ä guete Arzt u Typ ds si, sondern kennt sech o no super guet us mit sire Kultur. Somit hani der bescht Guide verwütscht wo me sech cha vorstelle! 🙂 Dermit aber no nid gnue… am spätere Nami het är mi no sire Fründin vorgstellt u mi zum ässe (chinesisch) iglade! 🙂 Isch übrigens super guet gsi! Am Vorabe hani du no d’Organisation vom Tag druf, bzw. vo der Reis nach Cuzco gmacht. Derna isch är mi scho wider cho abhole u het mir no meh vo der City zeigt! Genial gsi! Är isch du relativ früe wider gange, so das i mi no ine Disco begäh ha. Dert hani du der (angäblich) Sohn vom President vo Kolumbie kenne glehrt! Die Agabe wo är mir gmacht het schine jedefalls ds Stimme. Aber ds ganze isch mir glich so spanisch vor cho, das i ihn am nächschte Tag versetzt ha. Denn är het mi wöuä zumene Heliflug mitnäh, was mir so mitte i der Nacht übers Natel organisiert chli komisch isch ine cho! U da är so der Gross useghänkt het, het är mir eh nid passt. Obschons vilich no lohnenswärt hät chönne si, denn är het mir nachdäm i gseit ha was i schaffe äs Jobagebot gmacht als witere Libwächter (gloub 10 het er scho) vo 40’000 Dollar im Monet. Na ja…. weiss nid ob die ds Kolumbie so vil zahle füre Sohn vom Presi! 🙂 Jedefalls bini am Morge früe zrugg is Hostel u no chli chli ga schlafe. Am 5i bini nämli wider use für ufe Bus i Canon del Cola! Dert woni äbe mitem Heli hät häre chönne! 😉 D’Fahrt isch obermüesam gsi! Mega läng u mega holperig ufemene 4. Klass Fäldwäg! Derfür isch du d’Natur ä wunderschöne Ablick gsi! I bi du ca. 2 Stund retour gwanderet, bevor der Bus gno ha für zrugg. Dä isch du nachere no lengere u no asträngerende Fahrt am Abe am 8i in Arequipa zrugg gsi! I has aber gloub o nid guet erlitte, da i scho wider am mudere bi gsi. Na ja… nachere churze erholig isch du der Hector wider vor der Tür gsi. Mir si zäme chli ga Wy trinke, da är dä o sehr gärn het. 😉 Das mau ha du i zahlt! Isch mir süsch scho chum rächt gsi. Mir hei üs so guet underhalte, das är doch ds spät zure Konsultation cho isch, wo är wie so oft am telefon zwüsche ine no abgmacht het! Nachere witere churze Nacht, bini am Morge am 4i uf. Ha mini Sache packt u bi vom Hector a Flughafe bracht worde! Är isch mega lieb u guet gsi zu mir! Dert hei mir no ds Mörgelet, bevor mir üs verabschidet hei. Sogar cho winke isch er no, woni etliches nachem Check-In i Flüger gloffe bi.

¡Hasta la proxima desde Cuzco!

Ica und Nasca!

December 10th, 2006

D’Fahrt nach Ica isch ruhig verloffe und besser gange als i dänkt ha. In Ica am Abe am 8i acho het mi o scho ä Taxifahrer gfragt ob i i die Oase wöu wo doch ganz i der Nöchi isch! Das hani du o agno, da der Pris mit 5 Soles sehr fair gsi isch. I der Oase hets du meh oder weniger nur relaxe gä! 🙂 Aber isch o mau ganz schön so zwüsche düre! 😉 Ds Hotel het mi 15 Soles pro Nacht koschtet u für 20 hani a beide Abe äs Barbecue gha (na ja… Poulet u Hamburger bis zum abwinke mit vil Salat u vil vil Cuba Libre! :-)). Ds Türschte a dere Oase isch du mi Usflug mit de Buggys id Wüeschti gsi. Dä hets für 40 Soles gä, was grad mau 14 Franke si! 🙂 Derbi isch gsi, ca. 2,5 Stund, Sandboarde (sau schwär!), und jede Menge Action mitem Buggy, sowie der Sunneundergang beobachte! Das isch aber alles gsi, woni gmacht ha usser am Pool umehange u d’Sunne gniesse! 🙂 Hüt Morge früe am 5i isch es du uf nach Nasca! I ha Tour grad im Hotel buecht woni bi gsi. Het mi 60 Dollar koschtet füre Transport nach Nasca, der Flug über die bekannte Linie, ds Hotel woni grad bi zum relaxe am Pool und so und der Transport hüt abe ufe Nachtbus nach Arequipa! Het zwar nid alles so perfekt klappet, aber da i itz o uf spanisch cha reklamiere, hani doch no übercho, was i ha wöuä, bzw. ds guet gha ha! Später gits itz de no ä Pisco Sauer (inbegriffe) am Pool da! 🙂 Dir gseht, i ha mirs la guet ga! Der Flug isch übrigens super gsi, obschon i chum ha chönne Fotos mache!

Bis bald wider! LG a alli

Lima!

December 8th, 2006

Nachere asträngende Fahrt i der Nacht uf Lima, si mir am Morge früe scho gwarnt worde, das alles bösi und gfährlechi sige da ds Lima! Mir hei du glich äs Taxi gno, obschons no fasch mitte i der Nacht gsi isch u si mitem Taxi vo der Buskompanie sicher imene Hotel in Miraflores acho! Isch zwar chli türers Taxi gsi, aber tatsächlich sicher! 🙂 Nachere Mütze schlaf, si mir du o scho mitte id Stadt. Dert hei mir du der Placa Mayor bsuecht u si i diverse Museum gsi. Derna hei mir o no ds Postgebäude bsuecht, wo ä super Briefmarkesammlig het u vor Gebäudekonstruktion här sehr interessant isch gsi! Witer si mir du ds Goldmuseum ga aluege, wo üs super beidruckt het! Der Andres isch sogar no mau am Tag druf ds Museum ga aluege! 🙂 Aber es isch effektiv so guet gsi! Ha mirs auso o no überleit! Am Abe si mir du o no ines super türs Restaurant go Ässe! Es het sech aber voll u ganz glohnt, ds ässe isch super guet gsi! Mir hei fasch nüm chönne höre ässe! 🙂 Geschter hei mir du no 2 witeri Museum bsuecht. Derna bini lang im Internet, bzw. am Computer gsi um mini Sache ufe neuscht Stand ds bringe. Am Abe si mir du no churz dusse gsi zum gä ässe u derna bini no is Casino. Dert hani 35 Dollar gwunne bim Black Jack! 🙂 Hüt geits its witer nach Ica ine Oase!

Vo dert gits de meh! 🙂 Fotos sötte wider aktuell si.

LG

Huaraz!

December 8th, 2006

Das ganze isch doch scho ä paar Täg här, aber schint mir vor Auge wie geschter! Mir hei soooo vil und soooo genials gmacht und gseh! 🙂 Aber vo vore… Am Morge früe nachem Nachtbus hei mir grad sofort äs billigs u guets Hostel gfunde, wo mir üs du o chli zyt gä hei u no 2 Stündli oder so nachgschlafe hei! 😉 Het guet ta! Derna hei mir Toure füre Mäntig u Tsischtig buechet. Anschliessend si mir ufe Hauptplatz (Placa de Armes, wie chönnts o anders si :-), denn so heisse si fasch immer da) wo mir grad rächtzitig zure Parade vo Schuelene da us der Stadt cho si. Dä Umzug u alli Lüt i Sunntigkluft ds gseh isch du o sehr interessant gsi! Vo dert us si mir du ufene Ussichtspunkt i der Nöchi gloffe. Der Wäg isch super spannend u schön gsi. D’Natur da het scho chli ad Schwyz erinneret! Es heisst hie o, das es d’Schwyz vo Peru sig! Das het scho fasch chli Heiweh usglöst. Aber i ha ja der Andres derbi gha u so isch mir alles chli ringer gange. Näbscht am Baseldütsch, isch de das o fasch wie dehei gsi! Mir hei üs eh sehr guet verstande u är het o fasch genau die gliche Interässe u Vorstellige. Bim abe cho si mir de ufemene risige Fridhof gsi, was ganz Idrücklich gsi isch, denn dä isch rich beschmückt u atipisch suber gsi! Mir hei üs aber nid derfür gha Fotos ds mache, das doch mega vil Lüt gha het am Sunntig! Später si mir du o no ga ä Tämpel aluege i der nöchi. Das het sech sehr glohnt, obschon dä nur chlin isch gsi. Aber är isch super erhalte u d’Füerig isch sehr guet gsi. Obschon der Bueb ersch 15 Jährig gsi isch. Aber är schaffi scho 4 Jahr dert! Na ja… mir si üs so Sache nid gwöhnt halt. Am Abe si mir du no super guet ga ässe. Ds Restaurant het Pizza u Flammechueche gmacht als Spezialität! Das ds Ambiente mit sehr vil Holz im innere anes Chalet i der Schwyz erinneret het u o d’Bedienig super gsi isch, si mir du all Abe dert häre. Nachere Duschi si mir du derna o is Bett, das am Morge ja uf üsi Tour nach Chavin de Huantar gange isch. Die Tour het üs dürs tipische Hochland vo Peru gfüert, wiemes öppe so us Dokumentatione kennt. Dert hei mir ä super schöni Lagune (Bärgsee) bsuecht, ä id Landschaft gmachti Charte vo Peru gseh (natürlich) und ä Pass vo 4500m überquert, bis mir i dere Tämpelalag vo Chavin gsi si. Uf dere Tour isch wider eis ä Abschlussklass gsi, das mal us Ica. Das heisst mir hei wider dörfe häre für Fotos. 🙂 Das isch offesichtlich äs Highlight, weme sech mitemene Europäer darf la fotografiere! Na ja,… 😉 Mir heis ömu sehr guet gha dert u vil Idrücklichs gseh u erfahre! Am Abe si mir wie gseit wider is gliche Beizli u nachem Ticketkouf füre Tsischtig-Nachtbus uf Lima o wider is Bett. Am Morge früe si mir du Uf Tour ufe Pastoruri, ä Gletscher i der nöchi. Underwägs hei mir wider ä Lagune, ä sprudelndi Quelle vo Mineralie, die gröschti Blueme uf der Wält (Puyo Raymondi genannt) u Felsmalereie vore alte Kultur gseh! Alles sehr Idrücklich! Derna het vomene Parkplatz uf 4700m der Ufstieg ufe Gletscher agfange. Underwägs hei mir der Tobi und d’Iris usem Dütsche kenneglehrt gha. Die si du mit üs o ufe Gletscher gloffe. Allerdings hei die Beide sehr müe gha mit der Höchi, so das i underwägs sogar mau äs churzes Stück d’Iris ha ufetreit! Asträngend uf 5000m, chani euch säge!!! UFF!! 🙂 Aber es het offebar chli gnützt, denn witer obe het si du ume chli chönne loufe. Allerdings si die Beide nid bis ganz ufe cho! Der Andres u i si bis as Ändi ufem Gletscher, also bis uf guet  5200m ufe gloffe! Dert hets du wider Fotoshooting gä! 🙂 Zersch vo üs sälber, da mir doch sooooooo stoltz gsi si uf üs u üsi Leischtig u derna no ca. 20 mau mit diverse Peruaner!! 🙂 Scho fasch ds vil worde, da alli mau einisch oder lieber 2 mau ufs Foto hei wöuä! 😉 Abe isch du rassig gange. Nachemene chline Halt ufene Suppe si mir du is Hostel ga Tusche u när mit Iris und Tobi ga ds Nacht Ässe i üses Stammlokal! Dert hei mir du alli üsi Lideschaft vom ässe und koche zeigt, so das mir ca. 2 Stund über nüt anders gredt hei! 🙂 Hmmm, aber guet ischs gsi! Derna si mir ab ufe Bus nach Lima!

Bis bald wider vo da! LG

Trujillo

December 3rd, 2006

Hallo Zäme us Trujillo!

Hie isch doch etliches passiert i de letschte Täg. Nach der Akunft am Donschti Abe si mir no chli im Stedtli gsi. Der Hauptplatz und d’Umgäbig si wunderschön, ob bi Nacht oder Tag. Sehr vil Hüser im Kolonialstil. Mir hei du guet gässe u si no chli im Internet gsi, bevors o scho is Bett isch. Der Noemi isch leider nid so guet gange, so dass si am Fritig am Morge nid mit use cho isch. Drum bini mitem Andres i der Stadt gsi und mir hei ds Museum und äs Huus wo der Bolivar (befreier vo Peru) gwohnt het ga bsueche. D’Füerig i däm Huus isch nid nur sehr hübsch gsi, sondern o super guet. D’Vanessa (so heisst si) isch Studentin da u het das als Praktikum gmacht. Super guet gsi. Am Nami isch du d’Noemi o wider mitcho, wo mir i der Nöchi Piramidene (Mond u Sunne) si ga aluege. Im Füerer hei si nid so grüemt, aber üs hets super guet dünkt. O da hei mir ä Füererin gha, nid ganz so hübsch 🙂 aber derfür umso begabter. Si het nämli ca. 5 Sprache druf gha. Nid grad alles super guet, aber immerhin! 😉 Am Abe si mir nachem ds Nacht no um d’Hüser zoge. D.h. der Andres u i, da d’Noemi dehei blibe isch u sech gschonet het. Was mir vilich im Nachhinein o besser gmacht hätte! 🙂 Na ja,…. es isch ömu ä super coole Abe worde! Chli vil Alkohol im Spil gsi, aber derfür hei mir o super Lüt us Peru troffe! 2 Froue hei üs äs Lokal zeigt, wo super isch gsi zum tanze. Dert hei mir du o die 2 Here u 5 Froue troffe, wo üs super düre Abe begleitet hei. Vorallem ds Tanze mit dene Heissblüeter isch wider eis der Hammer gsi! 🙂 Das geit da scho anders ab als bi üs! 😉 Das Lokal isch rise gross gsi u het ca. 60-80 Tische gha, alles gfüllt. Derzue ä rise Tanzflächi i der mitti mitere super Liveband! Das het du o derzue gfüert, das mir ersch am 5i am Morge hei cho si! 🙂 Derfür hei mir hüt büesst. I weiss nid rächt wiso, aber es isch niemer zwäg gsi! Vilich het üs d’Noemi chli agsteckt. Wie o immer,… Am Nami si mir no ga Chan Chan aluege, die gröschti Ruinestadt in Südamerika! Grösser als Macchu Pichu! Isch gigantisch gsi zum luege! Dert hei über 35’000 Lüt gläbt! Am spätere Nami si mir du alli chli häre gläge, das niemerem guet gange isch. Itz schnäu öppis chlises gässe u im Internet gsi, geits de när für mi u Andres witer mitem Nachtbus nach Huaraz! D’Noemi geit direkt uf Lima witer, wo si öpper kennt. Mir wärde si i paar Tag wider träffe! Tja, liebi Lütli, das isch es wider eis usemene witere Stedtli da! Peru gfallt mir mittlerwile extrem guet!! 🙂 Bis bald!

LG Ralph