Ralph auf Reisen

¡Hola Amigos!

Das isch itz der letscht Itrag us Argentinie. Vorewäg chani scho eis säge, das es absolut überwältigend isch, was i hie ha chönne gseh u erläbe!!! Eifach TRAUMHAFT!!! Es fallt mir sehr schwär das i Wort ds fasse, denn das Gfühl wo eim überchunnt, weme da vor dene Wassefäll steit isch eifach WOW!!! Mir fähle schlicht die passende Wort für das alles nöcher ds bringe. Lueget nech doch de d’Bilder a, sobald das i die cha ufelade! U vorallem, wenn dir je Glägeheit heit, so bsuechet das Land u vorallem Igacu, es isch äs Traum!!! Itz aber derzue wis mir da süsch no so gange isch…. Wie der ja scho wüsst, bini mit Verspätig acho, da i ja später los bi in Buenos. Am Flughafe het mi du ä Österricher agsproche, wo mi schins in Buenos im Hostel gseh het. Är het mi gfragt ob i reserviert heig u i ha müesse verneine! Das isch ihm spanisch vor cho, denn das pass gar nid zumene Schwizer! Was het de dä für Schwizer troffe? Das kenne doch no anderi, oder nid? Jedefalls het är äs super cools Hostel reserviert gha. Also bini o dert zum Bus use gange zum frage ob si Platz hei! Das isch aber nüt gsi. U da dert no me si Usgstige, het sechs ergä, das d’Amanda us Australie o dert gstande isch ohni Zimmer. Also hei mir äs Taxi id Stadt teilt u si zäme ufene längi Suechi!! Es isch cho wis het müesse cho, mir hei imene sch… Hostel äs Plätzli gfunde, für si im Mehrbettzimmer u für mi im Gang usse! Na ja… immerhin ä Madratze! Am Morge “früe” (wen wunderts) druf si mir du i triefender Hitz, hie isch nämli no wermer als ds Buenos, ga äs neus Hostel sueche. Ä Frou usem Peter Pan Hostel het gseit es heig de sicher äs Plätzli, sobald am 10i der Check Out düre sig, also hei mir üsi Rucksäck dert gla u hei ire vertraut. Derna si mir i üses Parnterhostel vo däm vo geschter Nacht, das dert ds Morgeässe gä hät. Das hei mir du la si u hei eifach der Koin us Holland, wo mir vom Vorabe usem gliche Hostel bim Grillplousch kenne glehrt hei, mitgno für zu de Igaucu Wasserfäll! Mir si mitem Bus häre (8 Pesos) u hei dert der Parkitritt (30 Pesos) zahlt. Derna si mir mitem Bähnli zum gröschte Wasserfall (Tüfelsfäll), wos mir zerscht mau d’Sprach verschlage het. Nach längerem und x-Fotos si mir du mitemene Böötli zrugg zum Usgangspunkt vo de witere Wäge. Uf der Bootsfahrt hei mir no Krokodil, Schildkröt u diversi Vögel gseh. Usserdäm wimmlets hie vo bunte Schmätterlinge i allne farbe u grössine! Wunderschöni Natur o näb de Fäll! Vo dert us hei mir du der sogenannt ober Pfad begange, wo für mi der schönscht isch uni zu mim Lieblingsplatz erklärt ha, vo wo us me ä super Überblick über die meischte Fäll het. Woni das gseh ha, hets mir ds 2. mau d’Sprach verschlage! U das isch würklech so! Die wo mi chli kenne wüsse, das i no nie ufs Muul gheit bi gsi u i cha nech säge das i sit i underwägs bi no mau zuegleit ha, aber da het mir d’Sprach gfählt!! Ha se aber ume! Nachdäm si mir ufe under Pfad, wo mir no mau paar Fäll gseh hei u vo wo us mir ä chlini Bootstour gmacht hei. Die isch super gsi, aber vil ds churz. Uf dere ischme mitem Boot bis id Fäll ine gfahre u seich Nass worde, was bi dere Hitz ä absolute Traum gsi isch! Mir heis alli 3 mega gnosse us luschtig gha. Ufem Rückwäg hei mir no paar angäblich bissegi Tierli gseh! Die hani 2 Tag später in Brasilie chönne alänge u strichele! Derna hei mir no chli zyt gha bis der Park het zue ta u mir si no eis ufe ober Pfad, wo mir äs guets Plätzli gfunde hei zum relaxe mitere super Ussicht ufd Wasserfäll. Derna si mir vomene Parkwächter eher unfründlich zum ga ufgforderet worde, was mir du o gmacht hei, wo mir der Koin ändlech wach gha hei! Dä isch nämli igschlafe u der Wächter het ne nid wach übercho! So si mir wider im Bus zrugg. Derna hei mir i üsem neue Hostel wöuä ichegge…. wöuä!! Leider hets aber ke Platz gha, da schins nid gnue Lüt use sig u si no Reservatione gha heige vor üs! Super! Irgendwie het das das nätte Meitli am Morge äuä vergässe ds erwähne! Na ja… es isch du glich no guet cho, denn ä Ma wo dert schaffet het ä Fründ gha, wo ersch grad äs Hotel ufta het, u dä het no jede Menge Platz gha! Itz dänkt me es sig de sicher nid so das gsi, aber däm isch also nid so. Es isch ä gueti Underkunft, wenns o a allem andere no chli manglet. Aber mir si froh gsi hei mir öppis gha! U derna si mir wider der Koin ga abhole zum Nachtässe. Es isch du no ä Israeli (vo dene hani itz de d’Nase gstriche voll!) mitcho. I ha du ihn vermuetlich nid so nätt behandlet der ganz Abe, aber är het sech sehr Müe gä ds Bild vo ine wider ds verbessere! Allerdings isch ihm das o nid glunge! Na ja… chasch nid immer gwinne! Jedefalls hei mirs trotz allem sehr luschtig gha. Am nächschte Morge si mir 3 du wider i Nationalpark. Das mau si mir ane Wasserfall mitte im Dschungel gloffe, wo mir hei chönne ga Bade! Soooo schön gsi u het sooo guet ta, ä Tag chli ds relaxe. Nachdäm mir irgendwenn du mau gnue gha hei, si mir no eis ufe ober Pfad gange u hei dert ds Schauspiel no chli gnosse bim UNO spile, bis der Koin het müesse ga, da är ufe Nachtbus nach Buenos isch. Denn är isch am Tag druf vo Buenos nach Ushuaia gfloge. Also si mir relativ zytig wider zrugg. Am Abe het du d’Amanda no Kolleginne us Australie wider troffe. Die si mir chli komisch ine cho u i bi so müed gsi, das i mau früe is Bett bi. Am Morge si du d’Amanda u i uf die Brasilianischi Site i Nationalpark ga d’Wasserfäll aluege. Das isch allerdings nid so guet wie me ghört oder list. Denn äs söu schins schöner si als vor Argentinische Site. Mir si üs aber einig gsi, das es das bestimmt nid isch! Üs hets vil besser gfalle ds Argentinie u me gseht ds Brasilie grad mau öppe 2, 3 Fäll wome vo Argentinie us nid cha gseh. U etlechi wome ds Argentinie gseht, gseht me ds Brasilie nid! Na ja…. es isch glich sehr schön gsi, denn d’Natur isch eifach überwältigend! Nach dere eher churze Tour hei mir am Flughafe in Foz do Iguacu ä Halt igleit zum mis Ticket nach Salvador organisiere, was o klappet het! Juhuu, es geht zum Carneval!!! U am Abe zrugg si mir no mit de beide Fründinne vo der Amanda ga ässe, bzw. mir 2 nur trinke. Da het sech du mi negativ Idruck witer vertieft u i ha guet verstande, wiso das d’Amanda mau fürne Wuche alei greist isch. Die beide hei Tisch u süschtegi Maniere… na ja… nid vertiefe. Am Morge isch du d’Amanda ufene Adventure Trip u i ha Usgschlafe u mir ä gmüetleche Tag i der Stadt gmacht. Chli Internet, chli Sunnebedele u am spätere Nami d’Amanda verabschide, denn si isch ufe Bus nach Floreonapolis. Am Abe hets du no äs BBQ gä imene härzige Restaurant i der Nöchi. Allerdings hät i mir gloub besser ä guete Biz Fleisch usgsuecht, als der gmischt Grill gno! Aber na ja… me hets abe bracht u ds Dessert hets grettet! U eigentli hät i im Sinn gha derna eis ga ds lige… aber äbe… wis so isch, hani no müesse Gäld ha u bi drum no is Zentrum abe. De geit me doch no ufenes Schlummertrünkli nid wahr! U wis cha cho, isch i dere Bar no tanzet worde u i ha no äs Meitli gfunde, wo mir das alles chli bibracht het, da si Tanzlehrerin isch, wenn schins o für anderi Tänz. Aber die het das so guet gmacht, das die andere chum zum stuune us cho si u i ersch rächt nid!  Has doch rächt schnäu begriffe u es het mega gfägt. Drum isch du o grad sofort wider 4i am Morge gsi! U wis hie so isch, hani mi fasch müesse schäme, das i scho hei bi! Na ja… wirde äuä Alt! Hüt hani lang gschlafe, bi chli im Pool gsi u versueche itz mau no paar Bilder ufe ds lade. Wirde hinech bestimmt o no eis ä feine Biz Fleisch ga Ässe unes guets Glesi Argentinische Wy näh, bevors de Morn Morge am 10 ab 4i nach Brasilie a Flughafe geit! Das isch es also gsi mit spanisch!! Itz gits de no chuderwälsch u schlächts änglisch! Na ja… irgendwie wird das de sicher o ga! Me de also ds nächscht mau us Brasilie, weni das no schaffe nachem Carneval!

¡Espero que nos vemos pronto a la casa! ¡Saludos y abrazos a todos!

Ralph

Hallo Zäme,

scho gits wider ä mega länge Bricht! I chume eifach nüm is Internet i der letschte Zyt! Aber das isch ja o guet so! Also, i bi nachemene wider verspätete Flug guet in Buenos Aires glandet. Allerdings hani fasch ä Hitzeschlag erlitte, denn äs isch am 5i am Nami immer no 40 Grad gsi! Nachdäm i mir äs mega türs Taxi id Stadt gno ha, bini vo däm no bim falsche Hostel abglade worde. Das heisst i ha nachere halbstund astah a der Reception müesse erfahre, das das nid das Hostel isch, woni der Andres ud Noemi wider ha wöuä träffe. Also hani mi mitem ganze Gepäck ds Fuess ufd suechi gmacht! Has du nach längerem o gfunde. Leider hets ke Platz gha u die beide si o nid ume gsi. Also hani ine ä Nachricht hinderla u bi mir äs anders Hostel ga sueche. Ha du eis gfunde i der Nöchi. Später hanis no eis versuecht bi dene zwöi, aber das isch nüt gsi. U da ds Natel irgendwie nid so wott da in Südamerika, isch das o nid so gange wis hät söuä mit der Kommuniktion über dä Wäg. I bi du für mi no öppis ga ässe im Restaurant näb üsem Hostel. Das isch ä super feine Wok mit Poulet gsi! Am nächschte Morge hani die beide o verpasst, da i bis am 10 pfuset ha, obschon mega schlächt, das so super heiss isch gsi. I bi du afe chli dür Stadt zöttelet u ha mir äs erschts Bild gmacht vo däm ganze. Allerdings isch das wie i vilne Grossstädt für mi eher negativ usgfalle! Obschons fasch keni Lüt gha het, das Sunntig gsi isch u alli Gschäft gschlosse gha hei! Die Vorschusslorbeere wo Buenos übercho het vo vilne Lüt underwägs, ha i niene chönne gseh! Am Abe hani de versuecht die beide erneut ds träffe, was aber o nid klappet het, obschon i am Morge wider ä Nachricht hinerleit ha im Hostel vo ine. Na ja… mängisch söus halt nid eifach ga! I ha du im Hostel d’Paula us Chile troffe. Mit ire hani chli über Gott und die Welt plöiderlet. Derna hani für d’Manuela ud Evelyne, wo i der nacht druf nach Buenos gfloge si, gluegt ob i äs Hostel finde. Si hei äbe ke Internet gha u nach mine Erfahrige isch der Momänt eifach besser ds reserviere! Da chunnt de no ä Stori vomene andere Ort! Da si bi mir im Hostel nüt gha hei, hani mau ä Liste gmacht mit mögliche Hostel i der Nöchi, damit i de am Morge ufd suechi chönnt. Allerdings hani die nid brucht, da i am Morge nomau gfragt ha, bevor i mi ufd Suechi gmacht ha. Und siehe da… Glück gha, denn äs het äs Päärli am Morge früe unerwartet ustschegget! Also hani das Zimmer reserviert für die 2 Nächt wo si mögli gsi. Derna hani mi wider id Stadt gmacht u ha mau chli meh abklapperet. Bi underwägs o no ines Museum u ha ä Markt bsuecht, usw.. Aber irgendwie hani mi immer no nid chönne für die Stadt begeischtere. U am Nami isch die ganzi Fuessgängerzone zu mim erstuune fasch läär gsi… komisch! Aber das isch hie schins so, denn Gschäft hei alli zue zum Siesta mache bis am 5i. Nur wenegi si offe gsi. Also scho wider nüt mit Internet. Das isch nid mau me i üsem Hostel gange, denn die hei ä Panne gha! Am Abe hani du ändlech der Andres ud Noemi wider troffe! Si si i irem Hostel gsi! I bi du nacheme churze Bsuech bi ine, is mis Hostel zrugg gange, zum luege ob alles klappet het mitem Flug vo de andere Beide u ob si guet si acho. Das het alles wunderbar klappet u mir hei näbe im Beizli no äs Schlummertrünkli gno zäme. Dert hei si no Livemusig gha. Am Morge hei mir üs, d.h. d’Manu, Ev u i, ufe Wäg id Stadt begä. Bi mit ine richtig Recoletta gloffe. Underwägs hei mir ä gueti Tangoshow gseh u si derna no ine Chile, wo du grad d’Mäss agfange het. I bi also sit Jahre wider eis ir Chile gsi u das ersch no Katholisch u uf Spanisch! Interessant gsi. Am Abe hei mir bi üs im Hotel uf der Terasse im 5. Stock ds Nacht gässe miteme super feine Brot, Chäs, Schinke u Wy! Das isch wider eis gsi wie deheime! Het guet ta! Da ischs du o cho, das mir no Tanzunderricht gä, bzw. gno hei gägesitig! Sooo luschtig gsi, denn äs het niemer me würklech ä Ahnig gha usser vilich grad der Manu! Aber es het gfägt! U mir heis einigermasse zäme bracht! Nachdäm die beide is Bett si, hani du der Andres no troffe, wo mit mir no i Usgang wöuä het. Allerdings isch scho Morge am 3 gsi, woni ihn du mitere völlig frömde wo üs im Hostel agsproche het, ha la zie für no ga Tango ds tanze. I ha würklech nüm möge, da i die letschti zyt nur wenig u schlächt gschlafe ha! Am Morge hei du die beide äs neus Hostel brucht u mir si mau ids erscht beschte vo dene woni mir usegschribe ha ga luege. Und siehe da, mir hei Glück gha u si hei äs Zimmer gfunde für die 3 Nächt wo si no in Buenos gsi si. Drufabe si mir du ine grössere Park, wos Seeli hät söuä ha. Mit betonig uf hät, denn die si alli ustrochnet gsi! So hets du süsch ä gmüetleche Spatziergang gä. Später am Nami si mir alli no ga schlemme, da mir alli ir Heiwehkrise gsteckt si. U da das nid gnue gsi isch, si mir no grad zum Coiffeur! Am Abe si mir du ä gueti Tangoshow ga luege! Allerdings o Schweineteuer! Mit ässe hei mir alles i allem ca. 80 Dollar zahlt pro Person! Für üs wärs sicher nid vil, aber me gwöhnt sech halt a die Prise da! Aber isch u schön gsi u i ha sogar dörfe ga tanze! Das isch mir fasch nid pinlich gsi, denn da i keni länge Hose gha ha (i der Wösch gsi). So het das mit churze Hose i Turnschue sicher ganz guet zum super schöne Abekleid vo dere schöne Tangotänzerin passt! Na ja … chasch nöd immer günne! Immerhin hani zwöi super hübschi Begleiterinne gha! Das isch o äm Türsteher und am Pianospiler ufgfalle, denn die hei die beide nachem verla vom Lokal no iglade für am Mittwuch Abe no mau GRATIS ds cho! Nid schlächt! Derna si mir no ine Bar eis ga trinke. Allerdings isch das nid so der Hammer gsi, das mir gli richtig Hei si. Underwägs bini vo vilne so komische Type für Gäld aghaue worde. Alles isch chli mulmig gsi. Der eint het sogar no dergliche ta, als hät är ä Pistole imene Plastiksack, damit är vo mir Gäld hät übercho. Na ja… zum Glück hei das die beide Froue nid so mitübercho, da si nid würklech vil spanisch chöi. I ha die beide no heibegleitet u ha du us Sicherheitsgründ mau der Fotoapparat bi ine gla. Ha aube nid so Angst ums Gäld, aber d’Fotos würde mi mega reue! Bi aber guet hei cho. Am Tag druf, hei mir alli chli d’Heiwehkrise gschobe u hei drum nid so vil undernoh. Mir si underanderem no ga luege wäg üsne Flüg. Si hei ire Flug no müesse zahle u i ha müesse wüsse a welem Flughafe das mine abflügt. Mir hei nur grad 2 Stund gwartet, bis mir das i 5min erlediget hei gha! Sooo müesam! Nach däm allem si mir no i Botanisch Garte. Derna hei mir üs wider ds z’Nacht kouft u hei das mau no bi ine uf der Terasse gässe. Mir hei no mau chli tanze güebt u si derna is Kino go “Eine Nacht im Museum” luege. Isch änglisch gsi mit spanische Undertitel! Voll geile Film! Mir hei rächt müesse lache. Nach der Rückkehr is Hostel vo dene zwöi, hei si leider müesse feststelle, das ine 2 Täschli mit Kreditcharte usw. fähle! Das het du üsere heitere Stimmig nid so guet ta. U under dene Umständ, bini am Morge gar nid gärn abgreist. Si si mi imHostel cho abhole u hei mi a Flughafe begleitet. Immerhin hani ine no chönne hälfe, da der Flug scho wider verspätig gha het, das si ä Verluschtmäldig übercho hei vor Polizei am Flughafe. Na ja… nachemene Käfeli hani du dene beide scho wider Goodbye müesse säge! Het mi mega hert gha, denn mir heis so guet zäme, das i mi chli wie dehei gfühlt ha, weni mit ine bi zäme gsi! U meh gits de gli vo da us Iguazu. Es isch der absolut Traum hie, so vil vorewäg!

¡Hasta la proxima y la ultima en espagñol!

So, da si mir itz also, i der nächschte Millionestadt, in Buenos Aires u hei so um di 40 Grad! Ä mega Gägesatz zu Ushuaia, woni ds letscht gsi bi. Dert isch eher kalt u rägnerisch gsi über die ganze Täg i. Vo Calafate us bini mitere guete Stund Verspätig in Ushuaia glandet u ha zersch mau ä super schöne Idruck gha vom däre Umgäbig da, denn es isch äs herrlichs Wätterli gsi u 17 Grad. Also für die Gägend quasi perfekt, eifach so, wies när die ganz zyt nüm gsi isch! I bi mitem Taxi zum Hostel gfahre, woni mir scho länger reserviert gha ha u ha dert der Tag loker la usklinge. Nachemene chline Nachtässe, bini no mit paar neue Bekannte eis ga trinke ine gueti Bar. Allerdings nid allzu lang, da i wider eis rächt müed bi gsi. Bini irgendwie no vil i der letschti! Komisch!  Am Tag druf bini mit der Efrat us Israel wo mi bim warte ufe PC agsproche het u der Claudia us Dütschland, äre Bekanntschaft vom Vorabe zum Gletscher hinder der Stadt ufe gloffe. Ä schöne Usflug gsi, aber het mir chli ds dänke gä, was d’Israelin u iri Marschfähigkeite agange isch. Eigentli hät i dänkt die sig sech das de öppe gwöhnt, denn wie fasch alli Israelis het sie o grad ds Militär beändet u isch am Reise. Vo dene hets hie der Momänt im Fall wie Sand am Meer! U beliebt sie si gar nid öppe, denn si träte immer i grössere Gruppe uf u si rise Radaubrüeder u Schwöschtere. Aber sie sälber si mega überzügt, das se d’Argentinier sehr gärn hei! Am Abe hani mir du chli Pastas gmacht u mau ä Fläsche Wy trunke. Irgendwie het ds erneute allei umereise i mir chli Heiweh usglöst. Wahrschinlech hets mi ds fescht a mini Fründe erinneret, woni mit der Manuela u der Evelyne underwägs gsi bi, da mir üs so super verstande hei! Am nächschte Tag, hani mi du aber scho wider chönne freue, denn die beide hei dürnes Missgschick iri Plän chli gänderet u hei früecher uf Ushuaia wöuä cho, als erwartet!  Am nächschte Tag bini wider mit der Efrat underwägs gsi. Mir si ga ds Stedtli aluege. Si het extrem der Aschluss a öpper gsuecht u het unbedingt wöuä Lüt kenne lehre wo si mitne cha witer Reise. Die het nid chönne alei si u het mi chli turet. Am Abe hani mir no mau Pastas kochet u wider chli Wy trunke. Dä cheib isch eifach der Hammer da! Bim Nachtässe hani du no miteme Basler plöiderlet, wo da mitem Velo underwägs isch. Wüu mi d’Efrat chli turet het da si nid cha alei si, ha se de am Tag druf zum wandere mit i Nationalpark gno. Aber das hät i gloub besser nid gmacht. Mir hei ä chline Bärg bestige (950m oder so). Mues säge, es isch scho rächt ufe gange, so direkt vom Meer us, aber für üsi CH-Verhältnis doch nid allzu extrem. Es isch für mi, obschon i o nid der extrem Wanderer bi ä mega müesami Tour gsi. Underwägs hei mir no 2 (Australie u Schottland) troffe wo mit üs si ufe gloffe. Die Beide Froue hei du churz vorem Gipfel ufgä, das het agfange Stürme u Schneie u si zrugg gloffe. Mir beide Polizischte, der Schott isch nämli o eine gsi , heis doch no müesse mache bis ufe. Wo mir du retour Abe grennt si, si die beide Froue scho fasch erfrore gsi u mir hei mit ämene Notchocher vom Schott Suppe gmacht u hei die beide Froue so guets gange isch wider chli ufgwermt, bevor mir de der letscht Abstieg gmacht hei. Dä het extrem lang duret, da d’Efrat eifach nid cha loufe (weder ufe no abe!)! Wie übrigens alli Israeli underwägs nid! Sälbscht d’Manne, wo nachem Militär wo angäblich öppis vom hertischte uf der Wält söu si, ke grade Schritt vore ander bracht u hei sech überall halb hei häre knöilet, wenns mau chli Abe gange isch! Na ja… Dä Tag isch derfür schneller verbi als dänkt, da mir derna nüm am See na gloffe si, wüu mir alli völlig dürnesst gsi si! So het sechs du ergä das mir vorhär si zrugg gsi. So hani du am Abe no für die beide CH-inne (Mauela und Evelyne) äs Hostel chönne sueche, damit si de öppis hei, wenn si da achöme. Denn es isch no so schwär der Momänt, da alles überbuechet isch. Jedefalls hani öppis schöns für die 2 gfunde. Derna hani mir du no chli Fleisch kochet u mir äs Sandwich parat gmacht füre Usflug vom nächschte Tag. U zum ässe, wie chönnts anders si, hets du no der räschte Wy vom Vorabe gä! Der Usflug isch zure Insle mit Pinguine gange am nächschte Tag. Isch nid so der Hammer gsi. Ja nu… i ha mi derfür ufe Abe chönne freue, da ja d’Manuela ud Evelyne underdesse si acho. Mir si nach mim Usflug äs Käfeli ga ha, wo mir du no grad 2 witeri bekannti Gsichter troffe hei! Nämli d’Yvonne und d’Andrea, wo mir vo Calafate kenne. Mit ine hei mir du o abgmacht gha, das mir üs nachem Nachtässe (si si iglade gsi) no ire Bar träffe. Mir si also nachemene Zwüschehalt i der Tuschi ga ds Nachtässe u heis wider mega guet gha! Derna si mir no i die Bar, wo mir die beide wider troffe hei. Der Pascha het also sis Harem vo Calafate wider zäme gha! U wie der mi ja kennet, hanis mega gnosse! Am Tag druf bini wider mit der Manuela u der Evelyne underwägs gsi. Mir hei no dä Strandwäg im Nationalpark abgwanderet, woni vorhär nid ha chönne mache. Underwägs hei mir Lunch gässe. Ds ganz isch sehr schön gsi, obschon ds Wätter nid ganz mitgspilt het. Es het immer wider chli grägelet u isch stürmisch gsi. Am Abe si mir no mau zäme ga ds Nachtässe u i die Bar, wo mir wider uf die beide andere troffe si. Derna hets wider gheisse Abschied nä, denn am Morge bini witer uf Buenos Aires. Allerdings wirde i die beide hie wider träffe, denn si chöme o scho bald nache! Da freueni mi scho druf!

Meh de wider us Buenos Aires. Hoffe dir möget no nache mit dene mega länge Brichte!? Sött gloub wider i chürzere Abständ schribe!

Bis bald. LG alli

Der Start het ja mega Agfange! Statt wie gseit mitem Bus, isch mi der Guide mitem Auto cho abhole. Also scho mau chli bequemer. U dermit no nid gnue…. Im Auto sitze doch scho 2 flotti Schwizerinne! Das isch wider eis perfekt los! U i ha mi o grad uf ahieb sehr guet verstande mit der Manuela u der Evelyne, wo beidi us Züri Umgäbig si! Mir si der erscht Tag nur Auto gfahre (guet 800km). Underwägs isch es immer karger u öder worde, was d’Natur ageit. Im Auto hei mirs mega luschtig gha! Allerdings isch d’Fahrt trotz guetem PW relativ müehsam gsi. Am Abe si mir im Örtli Perito Moreno acho. Ds Hotel wo die beide underbracht si gsi u mis Hostel si ds gliche i eim gsi. Gäbegi Sach! Vo dert us si mir zäme ga ds Nacht ässe u derna no ine Bar äs Wyli ga trinke. Mit üsne Guides (isch no der Gorge derzue cho, nachdäm mir mitem Daniel da häre greist si) hei mirs mega luschtig gha! Am Morge früe isch es du mitem Gorge witer u der Daniel het sech wider ufe Heiwäg gmacht. Itz si mir o im Büsli underwägs gsi u das mit insgesamt 9 Lüt. Mir si ga Felsbemalige aluege i der Nöchi. Isch sehr interessant gsi u sehr sehr Alt alles. Dert hets du o der Mittagslunch gä, bevors wider nur im Bus witer isch bis mir am Abe in El Chalten si acho. Dert si mir wider ga ässe u äs Wyli trinke. Wirde no zum Alki da! Derna bini mit dene beide Froue zrugg i ires Hotel, da i no schnäu i mi Reisefüerer ha wöuä luege woni ine usgleit ha. Der Blick vom Typ a der Reception isch umwärfend gsi! Ha du o grad gseit, i blib nur churz! Derna hani no äs mini Spatziergängli i mis Hostel gmacht. Der Stärnehimmel underwägs isch faszinierend schön gsi! Bim Nachtässe hei mir übrigens no ä Komet am Himmel chönne beobachte. Am Morge bini du ufene Wanderig zur Laguna Torre am Fuess vom sälbige Bärg und em Monte Fitz Roy. Dert befindet sich o der Gletscher “Grande”. Na ja… dörft vermuetlich o no ä andere Name ha, obschons der gröscht i der Umgäbig isch! Die Wanderig isch traumhaft schön gsi u i ha am Fuess vom Gletscher mis Mittagspäuseli gmacht, mit Brot u Salami woni mir vorhär kouft ha im Supermarkt. Für die ganzi Wanderig hani 6 1/4 h brucht. Gemäss Karte wäres 8 h gsi ohni die chline Umwäge woni no gmacht ha. Am Abe isch es du mitem Bus witer nach El Calafate. Die Beide Girls si a däm Tag ufene gfüerti Tour u hei ä andere Bus gha als i. Si aber itz o da in Calafate. Der erscht Abe hani du no mini Wurst u chli Brot gässe woni no derbi gha ha. Derzue hani mir äs Wyli kouft, woni när leider ha müesse wäg lähre! Der erscht schlächt Wy da! Aber da het äuä öppis mit der Lagerig oder der Fläsche nid gstumme. Jedefalls hani du vom Petr (ä 46 Jährige ex. Tschech u Wältebummler wo Musig macht u fasch nur vo däm läbt) äs Glesli übercho u ihm chli zueglost bim Singe u Musig mache mit sire Gitarre. Bis i du o chli ha mitgsunge! Mega gmüetlech gsi. Ä u spezielle Mönsch dä Petr. Cha da nid alles verzelle wo är ds Brichte gha het, süsch geits no länger! Der erscht Tag hani am Nami ä Tour zum Perito Moreno Gletscher gmacht. Dert ä optionali Boottour vore Gletscher. Sehr idrücklich wie die Ismasse is Wasser gheie! Ä super gueti, wenn o türi Tour! Underwägs hani d’Andrea ud Yvonne us der Schwyz kenne glehrt. Nachem Nachtässe mit der Manuela und der Evelyne bini no die beide “neue” ga abhole u mir hei alli no chli äs Schwätzli gha i der Beiz, wo mir scho am ässe si gsi. Der Chällner het gloub sine Auge chume me traut…. 4 Froue u i am Tisch u vorhär hei mir no ä Spruch la ga, das sech d’Manu ud Ev nid nur der Salat, sondern o der Ma teili! Das isch doch chli vil fürne Macho Latino! Nachemene Schlummertrunk hani de die Girls verabschidet. D’Andrea ud Yvonne ganz, denn die si am Tag druf witer uf irere Reis. Die andere Beide hani am Abe druf wider troffe. Sie hei sech ä gmüetleche Shopping Tag gmacht u i bi ufene Schiffsusflug zu diverse Gletscher umene Gletschersee. I däm See hani du o ine müesse, zum erstuune vo 1000 andere Touris! Das het du o zur Folg gha, das i itz sicher bi 100 Lüt uf der Feriefotos bi! Müesst nid si! Tour isch aber super schön gsi! U für einisch hani o nid der Ussländeritritt i Nationalpark zahlt, sondern der Iheimisch. Dä isch grad ä drittel mit 10 Pesos! Am Abe bini du wider mit der Manuela u der Evelyne ga Ässe u ufe Schlummertrunk, bevor i die beide leider ha müesse verabschide, da i hüt uf Ushuaia witer bi! Schad gsi, denn mir hei üs super verstande u zyt isch immer mega schnäu ume! Wär sicher schön gsi no chli mit ine witer ds Reise! Na ja… mir gseh üs wider! Danke für die schöni Zyt!

LG a alli dehei, ha ghört es sig doch no chli Winter mässig worde. Gniessets!

Die Gägend isch für mi der absolut Traum was d’Natur betrifft! I ha mi hie so öppis vo wohl gfühlt, das i am liebschte nüm witer wär! Aber äbe… es mues aube eis äs Ändi ha, süsch chunnt me zu nüt. Was i hie no so gmacht ha…. vil! Bi also am 3. Tag wider ufem Velo gsi, obschon mir der Arsch nachem 1. länge Tag scho chli weh ta het. Bi du derfür nid allzu wit gange. Ha i der Nöchi der Cerro Otto bsuecht u bi dobe no chli umegwanderet, was mega mega schön gsi isch. Uf der Wanderig bini amene Art Restaurant (vermuetlich vomene Golfclub) verbi cho, wo äuä nur offe isch für Privatfeschtli. Dert hani mi ums Huus gschliche u bi ufere Terasse glandet mitemene sensationelle Usblick über alli Seeä da. U da i ganz alei gsi bi, hani mirs gmüetlech gmacht u chli gsünnelet. Derna bini witer gwanderet zum “Biedra de Habsburgo”, amene Felse wo wie ä Burg ufemene strategisch guete Ussichtspunkt isch. O vo dert us hani wider ä mega Rundblick gha. D’Wanderig dert häre u zrugg dür die Wälder da, isch absolut traumhaft schön gsi. D’Wälder si no völlig Natur belasse u alles schint wie imene Märli! Zrugg ufem Cerro Otto hani mir du wider äs mega feins Tortestück gönnt. Am Abe im Hostel het der Luici Spaghetti kochet. Si sehr fein gsi. Mir hei also wider alli zäme gässe u si derna no i Usgang. I ha mi du am Morge am halbi 6i mau glöst u bi ga schlafe! Woni am 10i wider uf Piste bi, isch du die letschi grad vom Usgang hei cho! I bi id Stadt u ha mir alles für d’Witerreis organisiert. Ha alli Flüg u Transpört bis uf Iguazu buechet. Derna bini no ufe Cerro Catedral gfahre mitem Bike. Das isch so zimli der höchscht grad i der Nöchi. Vo däm Bärg us hani no äs Mini Trekking ufd Spitze gmacht. Dert het me ä schöne Usblick gha, bis uf Chile abe. Ds Downhill derna isch äs mega vergnüege gsi! Allerdings o chli gwagt, denn i bi ohni der Wäg uf der Charte ds ha, mau gredi Abe dürne extrem steile Wäg. Aber i bi a mis gwollte Ziel cho, der Lago Gutierrez. U zwar ersch no ganz nöch a dene Wasserfäll woni bi ga aluege. Der Rückwäg het du chli pressiert, da i vor de 8i no im Bikelade ha wöuä si, da i gwüsst ha, das i ds Bike nid wie abgmacht am Mäntig cha zrugg bringe, da i denn am Morge früe witer ufd “Ruta 40″ bi. Also hani chli speed müesse mache us has no knapp vorhär gschafft! Mir heis du so gmacht, das i mis Bike am Sunntig am Abe ha chönne zrugg gä. Derna bini wider is Hostel zrugg. Am Abe hei si Grillparty gmacht! U wis so isch hie, bini o grad iglade worde, das ja eh gnue gha het! Derna si mir wider i Usgang. Stimmig isch allerdings nid so ufcho u drum hani mi du abgseilet u bi no chli anders ga aluege i der Stadt. Es isch du o nid allzu spät worde bi mir, so ca. 4i. Am Sunntig ha ig no derfinitiv die Tour “Ruta 40″ buechet u mis Bike abgä. Bi zersch no chli ds Stedtli ga aluege u ha no versuecht mir ä Massage ds gönne. Aber es si alli usbuechet gsi, so das es halt verspannt witer isch. Am Abe hani de mitem Luici u no eire chli Spaghetti gmacht, wo no vorig gsi si. Derna bini früe ga lige (halbi 12i), da i am Morge am 7ni bi abgholt worde für uf die “Ruta 40″. Das isch es de gsi vo Bariloche! Snif!

¡Hasta la proxima!

¡Hola Patagonia! Das isch es Erläbnis gsi! Nachere mega länge Busfahrt dür Steppeähnlechi Gebiet, hets hie churz vor Bariloche uf einisch agfange wächsle. Ds Gebiet isch vil grüener worde, es het Seeä u Flüss gha… Das het mir scho vom erschte Idruck gfalle. Ca. 20 km vor Bariloche si mir überne Hügel gfahre und da isch du der See und Bariloche uftaucht! Wie imene Märli bini mir vor cho, sooooo schön!! Ha mi grad ufe erscht Blick i die Umgäbig verliebt! U woni du zyt gha ha, ersch rächt! Es isch absolut Traumhaft hie!!! I würd gärn länger blibe, als i cha u alles ga erkunde wo nur möglich isch. Na ja… alles chame nid ha. I der erschte Nacht hani äs Hotel müesse näh, da süsch niene öppis frei gsi isch. Ha zwar so um die 35 Franke zahlt, aber es isch derfür wider eis alles sehr suber gsi u es het äs mega ds Morgebuffet gä! Da hani du o zuegschlage! Derna hani mi ufe wäg gmacht i mis Hostel, woni itz bi. Es isch mitte im Zentrum u nid so speziell guet, aber choschte nur 25 Pesos u het vil nätti Lüt da. Mit dene hei mir du geschter Abe o kochet u si zäme Usgange. Ha zwar fasch nüm möge, da i nachem ichegge hie äs Velo bi ga miete u mit däm so knapp 70 km um die Seeä hie gmacht ha! Wirde die ganz zyt hie alles mitem Velo mache. Es isch wunderschön so! Bi o scho ufemene Ussichtsbärg gsi. Die Gägend isch eifach ä Traum!! Allerdings isch es o mega Touristisch, da grad Feriezyt isch in Argentinie umso meh! Me chönnt meine me sig imene Art St. Moritz oder so öppisem i der Schwiz, wenn Hochsaison isch! Prise hie si o däm entsprächend. A jedem Egge hei si o Schoggi-, Ramsch-, Kleiderläde usw.. Was i underwägs o gseh ha, si vil Confi- u Bierfabrike. D’Hüser hie si o absolut Traumhaft u immer schön i die vile Wälder integriert mit Usblick über die schöne Seeä. Sobald i cha Bilder ufelade, wirdeni das mache. Damit dir chli a mire Freud über dä Traumhaft Ort chöit teil ha!

Bis bald. LG us Bariloche

D’Reis da häre isch ganz guet verloffe! Mir hei am Zoll o chum ä Minute verlore, da der Chauffeur vo allne chli Chligäld gsammlet het, als bestächig fürd Gränzlüt! Undänkbar bi üs, aber hie klappet das offesichtlich! Im Bus hani du o miteme Ma vo Mendoza gredt, wo mir sini halbi Läbensgschicht u mindeschtens 3/4 vo Mendoza erklärt het! Na ja… vil bracht hets äuä nid. Das relativ spät gsi isch u i mir vo Santiago us kes Hostel ha chönne reserviere, hani mi im Busterminal mau chli umegluegt tatsächlich ä Agentur gfunde, wo mir het chönne witerhälfe. Si het zimli vil Telefon gmacht, het aber du doch no äs Zimmer imene Dormitorio für mi gfunde. Het mi 30 Pesos une Nacht Schlaf koschtet! Tja… isch chli sehr lärmig u mega heiss gsi! Am Morge bini du ufd suechi nachemene andere Hostel. Ha gli eis gha, woni für 25 Pesos ha übercho im Dormitorio. Allerdings isch hie alles vil ruhiger u suberer! Derna hani mir der erscht Tag da in Mendoza Argentinie chli umd Ohre gschlage. Das heisst i ha alli mini Toure buechet u mau das sogenannt sagehafte Fleisch wo si hie hei versuecht! Das isch würklech sehr sehr guet! U nid nur das Glische stimmt! O das vo de super schöne Froue! Die hets da effektiv meh als a andere Orte! I der Nacht bini du scho grad chli umd Hüser zoge. Ds Nachtläbe hie fat mega spät a u drum ischs du zu mim erchlüpfe o scho grad wider Morge am 6i worde. Das isch du o der Grund derfür gsi, das i mis ds Morge woni ds guet gha hät, verpasst ha! Na ja… derfür isches nachem Usschlafe scho gli ufene Tour zu de Wygüeter! Und siehe da… öppis meh wo stimmt. Der Wy hie isch ä Traum!! Für mi no schöner als d’Froue! Oder äch… Jedefalls isch Tour super guet gsi. Am Abe hani de im Hostel der Federico us Buenos Aires kenne glehrt. Mir si du o grad zäme ga ichoufe u hei zäme kochet! Fleisch, wie chönnts hie anders si u i ha no chli Salat gmacht, wo ihm offebar sehr guet gmundet het! (french dressing!) Derna isch är scho gli ga lige, da är no müed isch gsi vo der Areis! I bi wider umd Hüser zoge u ha du ire Bar zwöi Däninne vo üsem Hostel troffe. Mit dene hani du no äs Glesli zwöi gno, bevor mir relativ früe is Bett si. Das heisst hie so ca. 3 am Morge! Am nächschte Tag hani nur grad ä City Tour gha am Nami, wo aber nid so der super knüller gsi isch! Allerdings gfallt mir d’Stadt super guet! Die hei hie mega vil Pärk u alles isch rächt grüen bepflanzt mit vil Bäum u Allee! Es isch ä Art Oase i dere süsch so trischte Umgäbig, wo eher äre Steppe glicht! Am Abe bini wider mitem Federico underwägs gsi. Mir si ga Ässe, was super guet gsi isch u derna no ine Disco. Dert isch allerdings nid so speziell gsi. Na ja… immerhin hets vil Lüt gha u churz bevor mir gange si, hets no ä Stripdease Show gä! 2 Froue u ei Ma! Also für alli öppis! Äs hiesigs Meitli hät mi du o gärn no chli lenger dert bhalte, aber i ha wöuä ga, da i früe use ha müesse. Es isch ja eh o scho wider 3 am Morge gsi!  Am Morge früe isch es use gange für ga ds Riverrafte! Mega spassig gsi! Da hani no der Andreas us Dütschland kenne glehrt, wo zur zyt grad in Buenos Aires schaffet. Bi ihm finde i de eventuell underschlupf weni uf Buenos Aires ga. Am Abe bini du rächt kabutt gsi vo däm doch länge Tag u bi nachdäm i mir ds Nacht gmacht ha scho gli ga lige. Am Morge früe bini du uf die nächschti Tour richtg Bärge, bzw. Chilenischi Gränze. Da ds Wätter nid so der Hammer isch gsi, hei mir leider nid so ä super Usblick ufe Höchscht Bärg in Amerika gha. Na ja… Es si zwar 6900 u öppis Meter, aber es schint alles irgendwie nid höcher ds si als bi üs, da Distanze hie so risig si! Wie o immer… mir si meh oder weniger der ganz Tag im Bus gsässe u hei grad mau 2-3 schöni örtli chli chönne ga aluege. Ischs nid so der Wärt gsi die Tour. Bi du am 8i im Hostel gsi, schnäu ga tüschele u derna scho ufe Bus nach Bariloche! Me wider vo da. Fotos gits so gli wie mögli.

¡Hasta la proxima!